Synti með selunum í Húsdýragarðinum

Selirnir í Húsdýragarðinum fengu óvænta heimsókn í dag þegar róðrarkappinn Fiann Paul gerði sér lítið fyrir og fékk sér sundsprett í tjörninni þeirra. Uppátækinu var meðal annars ætlað að undirbúa hann fyrir samveru með mun hættulegri dýrum.

Fiann er eflaust þekktastur fyrir árangur sinn í kappróðri en hann hefur keppt fyrir Íslands hönd og slegið tvö heimsmet í greininni. Það vita hins vegar færri að hann er slunginn ljósmyndari.

„Það má segja að ég sé að kynna nýtt skeið listsýninga. Þetta er margvíð og gagnvirk sýning sem rennur inn í umhverfið. Það er ekki bara ytra útlitið heldur einnig andinn á staðnum og staðurinn sjálfur."

Frumsýningagestir Fianns voru Grænlensk börn en mörg þeirra prýða einmitt myndirnar sem voru teknar á heimaslóðum þeirra.

Sundsprettinum var ekki einungis ætlað að vekja athygli á sýningunni heldur einnig að undirbúa Fiann fyrir heimsmeistaramót ræðara sem haldið verður á Indlandshafi á næsta ári..

„Ég verð að venjast svona skepnum því á leiðinni yfir Indlandshafið er mikið af hákörlum. Ég leit á svona skepnur sem vini í fyrri ferð minni, þar sem ég sá höfrunga og hvali næstum því á hverjum degi. En þessi dýr eru hálfgerðir hákarlar, kannski."