Golf

Sterkasta golfmót allra tíma hér landi?

Sindri Sverrisson skrifar
Íslandsmeistararnir Guðrún Brá Björgvinsdótti og Guðmundur Ágúst Kristjánsson verða á meðal keppenda um helgina.
Íslandsmeistararnir Guðrún Brá Björgvinsdótti og Guðmundur Ágúst Kristjánsson verða á meðal keppenda um helgina. MYND/SETH@GOLF.IS

Skærustu stjörnur golfíþróttarinnar hér á landi verða á ferðinni í Mosfellsbæ á laugardag og sunnudag þegar ÍSAM-mótið fer fram. Þar gæti verið um að ræða fyrsta mótið sem telur inn á heimslista áhugakylfinga frá því að kórónuveirufaraldurinn setti allt íþróttalífið úr skorðum.

Á heimasíðu Golfsambands Íslands segir að eftir því sem næst verði komist hafi keppendahópur á golfmóti á Íslandi alla vega ekki verið sterkari í nokkur ár. Íslandsmótið á Akureyri árið 2016 gæti komist nálægt styrkleikanum.

Í kvennaflokki eru atvinnukylfingarnir Guðrún Brá Björgvinsdóttir (GK), Valdís Þóra Jónsdóttir (GL) og Ólafía Þórunn Kristinsdóttir (GR) skráðar til leiks. Þær hafa ekki keppt á sama golfmóti frá því á Íslandsmótinu á Akureyri árið 2016.

Í karlaflokki eru einnig allir sterkustu atvinnukylfingar landsins á meðal keppenda. Axel Bóasson (GK), Andri Þór Björnsson (GR), Bjarki Pétursson (GKB), Guðmundur Ágúst Kristjánsson (GR, Haraldur Franklín Magnús (GR) og Ólafur Björn Loftsson (GKG).

Þá eru sterkustu áhugakylfingar landsins á meðal þátttakenda en flestir þeirra sem stunda nám í Bandaríkjunum eru núna staddir hér á landi vegna kórónuveirunnar.

Mótið um helgina er það fyrsta af þremur sem GSÍ stendur fyrir á svokallaðri heimslistamótaröð. Markmiðið með mótaröðinni er að kylfingar geti styrkt stöðu sína á heimslista áhugakylfinga en nú var atvinnukylfingum sérstaklega boðið að taka þátt vegna þess að mótahald erlendis liggur niðri.

Samkvæmt golf.is verður leikið eftir sérstökum Covid- og staðarreglum á Hlíðavelli. Keppendafjöldi takmarkast við 39 kylfinga. Á Hlíðavelli verður einmitt einnig leikið á Íslandsmótinu í byrjun ágúst. Helgina 23.-24. maí fer svo fram fyrsta stigamót ársins á mótaröð GSÍ, á Garðavelli á Akranesi. Þar er búist við 140 keppendum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.