Hull sótti stig á Anfield

Nýliðar Hull halda áfram að koma á óvart í ensku úrvalsdeildinni og í dag gerði liðið 2-2 jafntefli við topplið Liverpool á Anfield eftir að hafa komist 2-0 yfir.

Smáliðið náði 2-0 forystu eftir 22 mínútur þegar Paul McShane skoraði með skalla og skömmu síðar skoraði varnarmaðurinn Jamie Carragher afar slysalegt sjálfsmark.

Fyrirliðinn Steven Gerrard kom sínum mönnum til bjargar enn eina ferðina og skoraði bæði mörk Liverpool sem jafnaði fyrir hlé.

Heimamenn voru mun sterkari og gerðu sig líklega til að ná í öll stigin, en urðu að sætta sig við þriðja jafnteflið í röð á heimavelli - sannarlega blóðugt fyrir lið sem er að berjast um meistaratitilinn.

Það vakti líka athygli að 20 milljón punda maðurinn Robbie Keane var á varamannabekknum allan tímann og fékk ekki tækifæri þrátt fyrir að Liverpool þyrfti sárlega á mörkum og stigunum þremur að halda.

Liverpool hefur 38 stig á toppi deildarinnar en Chelsea er í öðru með 36 stig og getur því komist á toppinn með sigri í leiknum sem liðið á til góða á morgun. Manchester United og Aston Villa hafa 31 stig en United á tvo leiki til góða - þann fyrri gegn Tottenham klukkan 17:30 í dag.

Grétar lagði upp mark

Aston Villa vann góðan 4-2 sigur á Bolton þar sem Grétar Rafn Steinsson var í byrjunarliði Bolton, átti skalla í slá og lagði upp síðara mark Bolton. Það dugði þó skammt gegn Villa, sem fékk tvö mörk frá Gabriel Agbonlahor og eitt frá Ashley Young.

Everton vann frábæran 1-0 útisigur á Manchester City með marki frá Tim Cahill í blálokin, en Everton gat ekki teflt fram einum einasta framherja í dag vegna mikilla meiðsla í herbúðum liðsins.

Wigan jók enn á ógæfu Paul Ince og félaga í Blackburn með 3-0 sigri á heimavelli, Sunderland vann nauðsynlegan 4-0 sigur á West Brom og þá gerðu Stoke og Fulham 0-0 jafntefli.

Úrslitin í dag (leikir sem hófust kl. 15):

Liverpool 2 - 2 Hull City

0-1 P. McShane ('12)

0-2 J. Carragher ('22, sjálfsmark)

1-2 S. Gerrard ('24)

2-2 S. Gerrard ('32)



Aston Villa 4 - 2 Bolton

0-1 J. Elmander ('17)

1-1 G. Agbonlahor ('25)

2-1 K. Davies ('40, sjálfsmark)

3-1 G. Agbonlahor ('68)

4-1 A. Young ('78)

4-2 K. Davies ('86)

Manchester City 0 - 1 Everton

0-1 T. Cahill ('90)



Middlesbrough 1 - 1 Arsenal

0-1 E. Adebayor ('17)

1-1 J. Aliadière ('29)

Sunderland 4 - 0 West Bromwich Albion

1-0 K. Jones ('22)

2-0 K. Jones ('23)

3-0 A. Reid ('40)

4-0 D. Cissé ('47, víti)



Wigan Athletic 3 - 0 Blackburn Rovers

1-0 E. Heskey ('10)

2-0 Luis Valencia ('12)

3-0 L. Cattermole ('77)



Stoke City 0 - 0 Fulham