Verjendur Barkar og Annþórs ósáttir við rannsókn og viðhorf lögreglu

Verjendur Barkar Birgissonar og Annþórs Kristján Karlssonar, sendu frá sér yfirlýsingu vegna yfirlýsingar lögreglunnar á Selfossi um rannsókn á andláti samfanga Barkar og Annþórs.

Þannig segir í yfirlýsingunni að verjendurnir hafi ekki vitað af umfangi rannsóknar lögreglunnar á Selfossi, sem annaðist málið.

Meðal annars nefna þeir rannsókn á hljóðbærni fangaklefa á Litla-Hrauni, en reistur var sambærilegur klefi í lögregluskólanum og hljóðið kannað.

Einnig voru verkfræðingar fengnir til þess að meta hvort áverkarnir á líkama hins látna hefðu getað verið af mannavöldum.

Þá saka verjendurnir lögregluna um að hafa fyrir löngu myndað sér skoðun um sekt Barkar og Annþórs.

Málið er nú komið inn á borð til ríkissaksóknara og verður ákvörðun tekin á næstu vikum hvort það verði ákært í málinu eða ekki.