Blatter tekur fyrir útrás ensku úrvalsdeildarinnar

Sepp Blatter segir að útrás ensku úrvalsdeildarinnar verði aldrei að veruleika svo lengi sem hann verður í starfi forseta Alþjóða knattspyrnusambandsins, FIFA.

Fyrir nokkru samþykktu fulltrúar allra ensku úrvalsdeildarliðanna að skoða þann möguleika að bæta við einni umferð við tímabilið og að hún færi fram í borgum víðs vegar um heiminn.

Blendin viðbrögð hafa verið við þessu en gagnrýnendur þessa hafa helst sagt að um sé að ræða peningagræðgi félaganna og ekkert annað. Stuðningsmenn enskra félaga eru einnig afar mótfallnir þessu fyrirkomulagi.

Blatter sagði í viðtali við fréttastofu BBC að þessar áætlanir gætu einnig komið enska knattspyrnusambandinu illa en það hyggst sækja um að halda HM í knattspyrnu árið 2018.

„Þessi áætlun tekur ekki tillit til stuðningsmanna félaganna og gefur til kynna að félögin vilji aðeins gera þetta til að ná sér í pening," sagði Blatter. „Þetta mun aldrei gerast, alla vega ekki svo lengi sem ég er forseti FIFA."

„Enska úrvalsdeildin er ríkari en aðrar deildir og ber því meiri ábyrgð en aðrar deildir. Þetta stríðir gegn þeirri ábyrgð. Þetta er eitthvað sem ég hef engan skilning á og það er ljóst að framkvæmdarstjórn FIFA mun aldrei samþykkja þessa áætlun."

Framkvæmdarstjóri ensku úrvalsdeildarinnar, Peter Scudamore, varði þessa áætlun um helgina og sagði að FIFA gæti aldrei komið í veg fyrir þetta.

„Það er ekki satt," sagði Blatter um ummæli Scudamore. „Jafnvel þótt enska knattspyrnusambandið myndi leyfa þetta þyrftu knattspyrnusambönd þeirra landa þar sem leikirnir ættu að fara fram að samþykkja þetta og það yrði mjög erfitt að fá það í gegn."

„Þar að auki myndi framkvæmdarstjórn FIFA beita reglugerð sem segir að hún megi koma í veg fyrir hvers kyns áætlanir sem myndi skaða málstað knattspyrnunnar og misnota hana."

„Þetta er misnotkun. Enska úrvalsdeildin vill verða ríkari og auka mikilvægi deildarinnar."