Steinunn: Jón Ásgeir tekur sínar ákvarðanir

„Ég hef ósköp lítið um það að segja. Hann tekur sínar ákvarðanir," segir Steinunn Guðbjartsdóttir, formaður slitastjórnar Glitnis, spurð út í orð Jóns Ásgeirs Jóhannessonar sem telur líklegt að hann og viðskiptafélagar hans fari í skaðabótamál gegn slitastjórninni. Þetta kom fram í máli Steinunnar í Kastljósi í kvöld.

Slitastjórn Glitnis hóf málaferli fyrir dómstóli í New York gegn Jóni Ásgeiri, Þorsteini Jónssyni, Jóni Sigurðssyni, Lárusi Welding, Pálma Haraldssyni, Hannesi Smárasyni, Ingibjörgu Pálmadóttur og endurskoðunarfyrirtækinu PriceWaterHouseCoopers í maí á þessu ári. Slitastjórnin telur að Jón Ásgeir og viðskiptafélagar hans hafi með sviksamlegum hætti haft 230 milljarða króna af bankanum, fé sem Glitnir aflaði með skuldabréfaútgáfu í Bandaríkjunum árið 2007.

Lögmenn stefndu kröfuðust þess að málinu yrði vísað frá og féllst dómari í New York á þá kröfu í dag. Dómarinn sagði að málið ætti heima á Íslandi en vísaði málinu frá með tveimur skilyrðum. Í fyrsta lagi verða hinir stefndu að fallast á lögsögu íslenskra dómstóla í málinu og í öðru lagi þyrftu þeir að samþykkja að eignir þeirra erlendis væru aðfararhæfar ef þeir verða dæmdir til greiðslu skaðabóta.

Steinunn sagði í samtali við fréttastofu Stöðvar 2 og Vísis skömmu eftir að úrskurður dómarans lá fyrir niðurstöðuna vonbrigði, en málið yrði þó rekið áfram hér á landi.

Segir kvöð fylgja starfinu

Á vef Viðskiptablaðsins sagði Jón Ásgeir slitastjórnina hafa brennt upp milljörðum fyrir kröfuhöfum Glitnis. „Við höfum orðið fyrir miklum óþægindum og höfum tapað miklum peningum. Ég geri ráð fyrir að við munum fara í skaðabótamál vegna þessa."

Steinunn var spurð út í þessi ummæli í Kastljósi í kvöld en hún sagðist hafa lítið um þau að segja. „Það er auðvitað þannig að starfi sem þessu fylgir sú kvöð að fólk verður að vera tilbúið að fylgja málum eftir. Það er okkar skylda og það höfum við gert."