Viðrar vel til skíðaiðkunar á Norðurlandi

Það viðrar vel til skíðaiðkunar norðan heiða en höfuðborgarbúar og nærsveitungar þeirra þurfa að leggja á sig töluvert ferðalag vilji þeir komast í brekkurnar í dag.

Skíðasvæði Tindastóls verður opið í dag frá klukkan 11 til kl 16. Veðrið um klukkan 9 var þar prýðilegt, hægur vindur og hiti rétt yfir frostmarki og alskýjað. Samkvæmt staðarhaldara er þar „allt fullt af snjó á svæðinu bæði í brekkuni og utan brautar í fjallinu.

Búast má við miklu lífi og fjöri í Hlíðarfjalli í dag en þar fer fram lokadagur Andrésar andar-leikanna. Fjallið er opið frá klukkan 10 til 16 og á tíunda tímanum var hægur vindur og hiti um 5 stig. Skíðaskólinn er þar á sínum stað frá klukkan 10 til 12 og 10 til 14.

Í Bláfjöllum er hins vegar lokað vegna veðurs. Þar er rigning, þoka og rok og búist er við því að það haldist þannig fram yfir klukkan 14 í dag.

Skálafell hefur hins vegar lokað en alls var opið í 16 daga af 27 mögulegum opnunardögum í ár. Fram kemur í tilkynningu að alls hafi 12.947 gestir sótt fjallið heim þessa daga.