Hundrað kíló af Lego-kubbum

Á bókasafni Kópavogs er oft margt um manninn, en sjaldan eins og í dag þegar boðið var upp á kennslu í byggingatækni úr tæknilego-kubbum.

Jóhann Breiðfjörð, sem fékk titilinn tæknilego-fræðingur frá einum nemanda sínum, sá um kennsluna í dag og þetta er ekki fyrsta námskeiðið sem hann sér um.

„Ég er búinn að vera í þessu í um 14 ár, að fara í grunnskólana og kenna krökkunum á tæknihliðna á Lego," segir Jóhann og fullyrðir aðspurður að Lego sé alltaf jafn vinsælt.

„Það er sívinsælt. Það finnst öllum börnum gaman að skapa og þetta er auk þess einföld leið til að kenna þeim ýmis tæknileg atriði."

Það dugði ekkert minna en um 100 kíló af tæknilegókubbum til kennslunnar, en kubbana fékk Jóhann þegar hann var starfsmaður hjá Lego um fimm ára skeið.

„Jú, ég vann hjá þeim í um fimm ár og fékk þá þennan lager sendan. Þegar ég hætti dagaði þetta uppi inni í bílskúr svo það var ástæða til að hleypa krökkunum í þetta þegar þetta var farið að rykfalla," segir Jóhann.

Jóhann hyggur á frekara námskeiðahald í tæknilego-fræðum í sumar og verður hægt að bóka sumarnámskeið hjá honum á heimasíðunni nyskopun.net frá og með næstu viku.