Innlent

Hvalá í Ófeigsfirði komin á kortið sem áfangastaður

Kristján Már Unnarsson skrifar
Jeppafjöldi við göngubrúna yfir Hvalá í Ófeigsfirði síðastliðinn sunnudag. Þar er Hvalárfoss.
Jeppafjöldi við göngubrúna yfir Hvalá í Ófeigsfirði síðastliðinn sunnudag. Þar er Hvalárfoss. Vísir/KMU.
Áhugi fólks á að skoða umhverfi Hvalár í Ófeigsfirði á Ströndum hefur stóraukist, ef marka má þann jeppafjölda sem sést hefur aka þessa torfæru leið að undanförnu. Við göngubrúna yfir Hvalá, á stað sem fáir komu á, má þessa dagana iðulega sjá fjölda jeppa en þar endar vegurinn í Árneshreppi.

Leiðin þangað er þó seinfarin. Komast má á fólksbílum að gömlu síldarverksmiðjunni að Eyri í Ingólfsfirði og má áætla það um fimm stunda akstur úr Reykjavík. Síðan tekur við um klukkustundarakstur að Hvalá eftir vegslóða sem, enn sem komið er, telst aðeins jeppafær.

 

Vinnuvélar á vegum Vesturverks lagfæra veginn um Ingólfsfjörð þessa dagana.Vísir/KMU.
Umræður um Hvalárvirkjun hafa beint athygli almennings að svæðinu. Þannig hafa fréttir af lagfæringu vegarins um Ingólfsfjörð verið áberandi síðustu vikur.

Athygli vakti í síðustu viku að einhver hafði fjarlægt borða frá Minjastofnun en þeim var ætlað að afmarka fornminjar svo verktakar Vesturverks myndu ekki raska þeim. Borðarnir hafa nú verið settir upp aftur.

Frá Valleyri í Ingólfsfirði. Þar rak Norðmaður síldarstöð á árum fyrri heimsstyrjaldar. Fornminjar hafa verið afmarkaðar með borða.Vísir/KMU.
Göngubrúin er við Hvalárfoss og margir láta sér nægja að skoða hann og nánasta umhverfi. Aðrir leggja á sig göngu upp með Hvalárgljúfri norðan ár, að fossinum Drynjanda. Gangan tekur venjulega eina og hálfa til tvær stundir, eða 3-4 stundir fram og til baka. Þangað er ekki merkt gönguleið og vandratað en slóðar eru byrjaðir að myndast í gróðurlaginu eftir því sem fleiri ganga um svæðið.

Borðar Minjastofnunar á Valleyri í Ingólfsfirði.Vísir/KMU.
Enn einn valkostur ferðamanna er að ganga upp með Hvalá að sunnanverðu, að fossinum Rjúkanda í samnefndri á, sem sameinast Hvalá. 

Ferðalangar nota göngubrúna við Hvalá einnig sem upphafs- og/eða endastað fyrir lengri göngur, og þá með tjaldgistingu, svo sem í Eyvindarfjörð eða um Drangaskörð, og jafnvel enn norðar, á staði eins og Bjarnarfjörð, Skjaldabjarnarvík og Reykjarfjörð.

Vegurinn milli Ingólfsfjarðar og Ófeigsfjarðar telst aðeins jeppafær.Vísir/KMU.
Skiptar skoðanir eru meðal íbúa Árneshrepps um hvort Hvalárvirkjun muni styðja við heilsársbyggð í hreppnum, eins og heyra má í eftirfarandi frétt Stöðvar 2, en þar má sjá myndir úr Ófeigsfirði; af Hvalá, Hvalárfossi og Drynjanda:

 


Tengdar fréttir

Fern samtök kæra virkjun í Árneshreppi

Ákvörðun sveitarstjórnar Árneshrepps um að veita leyfa til framkvæmda við Hvalárvirkjun í Ófeigsfirði hefur verið kærð af fernum samtökum í náttúruvernd. Fylgja í kjölfar kæru landeigenda.

Slæmt ef merkingar vegna fornminja eru fjarlægðar

Hælar og bönd sem sett voru til að afmarka fornminjar í Ingólfsfirði, þar sem hafnar eru undirbúningsframkvæmdir í tengslum við Hvalárvirkjun, voru fjarlægð í fyrrinótt.




Fleiri fréttir

Sjá meira


×