Átta íslensk mörk í sigri

Íslendingalið Westwien vann fimm marka sigur á Retcoff Graz í austurrísku úrvalsdeildinni í handbolta í dag.

Viggó Kristjánsson skoraði fimm marka Westwien og Ólafur Bjarki Ragnarsson þrjú í 30-25 sigrinum. Guðmundur Hólmar Helgason komst ekki á blað.

Heimamenn í Westwien tóku strax forystuna og þegar komið var í hálfleik var staðan orðin 14-11.

Retcoff tók áhlaup undir lokin og náði að jafna í 25-25 en þá sögðu heimamenn stopp og skoruðu síðustu fimm mörkin í leiknum.