Fimm íslensk mörk í sigri

Íslendingalið Ribe-Esbjerg vann Nordsjælland á útivelli í dönsku úrvalsdeildinni í handbolta.

Rúnar Kárason skoraði fjögur mörk fyrir Ribe-Esbjerg og Gunnar Steinn Jónsson eitt í 29-25 sigrinum.

Gestirnir keyrðu á Nordsjælland undir lok fyrri hálfleiks og staðan var 12-16 í hálfleik. Heimamenn náðu aldrei að jafna leikinn aftur og gestirnir tóku stigin tvö.

Í Svíþjóð töpuðu Ágúst Elí Björgvinsson og félagar í Sävehof fyrir Alingsås 30-32.

Ágúst Elí fann sig ekki í markinu og varði aðeins þrjá bolta af tuttugu sem hann fékk á sig. Hann varði hins vegar tvö af fjórum vítaskotum.