Viktor Gísli genginn í raðir GOG

Viktor Gísli Hallgrímsson, landsliðsmarkvörður í handbolta, er genginn í raðir danska úrvalsdeildarliðsins GOG á Fjóni en hann er búinn að skrifa undir þriggja ára samning við félagið.

Þetta kemur fram á heimasíðu GOG en Viktor Gísli kemur til danska liðsins frá uppeldisfélagi sínu Fram þar sem hann hefur verið aðalmarkvörður í þrjú ár þrátt fyrir ungan aldur.

Viktor Gísli varði mark íslenska liðsins í síðasta landsleik á móti Makedóníu og stóð sig vel en hann er af flestum talinn efnilegasti markvörður sem komið hefur upp í íslenskum handbolta. Hann er aðeins 18 ára gamall.

„Markmið mitt er að verða besti markvörður heims en það er langur vegur í það. Ég get spilað góða leiki en mig vantar stöðugleika. Ég þarf að taka þetta skref fyrir skref og GOG er rétti staðurinn fyrir mig að þróast áfram sem handboltamaður,“ segir Viktor Gísli á heimasíðu GOG.

GOG er eitt stærsta og besta liðið í Danmörku en það hefur sjö sinnum orðið meistari, síðast árið 2007. Það hafnaði í öðru sæti deildarkeppninnar í vetur og er komið í undanúrslit úrslitakeppninnar.

Hægri hornamaðurinn Óðinn Þór Ríkharðsson spilar með GOG en þá er Arnar Freyr Arnarsson, línumaður landsliðsins, einnig á leið til félagsins í sumar frá Kristianstad í Svíþjóð.

Viktor Gísli verður með reynslubolta með sér í markinu á næsta ári því GOG var áður búið að semja við fyrrverandi sænska landsliðsmarkvörðinn Dan Beutler. Sá er fæddur 1977 og er ekki nema 23 árum eldri en Viktor sem er fæddur árið 2000.