Sigurður Gunnar kemur aftur inn í landsliðið og er reyndasti maður hópsins

Tveir nýliðar eru í A-landsliðshóp karla í körfubolta sem keppir á Smáþjóðaleikunum í Svartfjallalandi en Craig Pedersen mun ekki þjálfa liðið.

Hilmar Smári Henningsson og Halldór Garðar Hermannsson stóðu sig frábærlega með sínum liðum í Domino´s deild karla í vetur og fá nú sitt fyrsta tækifæri með A-landsliðinu.

Hilmar Smári Henningsson var kosinn besti ungi leikmaður deildarinnar á dögunum og er bara átján ára gamall. Halldór Garðar er 22 ára.

Finnur Freyr Stefánsson hefur verið þjálfari íslenska karlalandsliðsins í undirbúningnum og verður aðalþjálfari liðsins á mótinu og aðstoðarþjálfari hans er Baldur Þór Ragnarsson.

Craig Pedersen þjálfari á ekki heimangengt í verkefnið en hefur tekið þátt í undirbúningnum með þjálfurum sínu og því verða Finnur Freyr og Baldur Þór með liðið á leikunum líkt og fyrir tveim árum.

Karlalandsliðið leikur gegn landsliðum Möltu, Lúxemborg og Svartfjallalands fyrstu keppnisdagana 28.-30. maí. Frídagur verður þann 31. maí og svo er lokaleikur liðsins 1. júní gegn liði Kýpur.

ÍR-ingurinn Sigurður Gunnar Þorsteinsson er reyndasti leikmaður landsliðsins með 54 leiki. Hann hefur samt ekki spilað með landsliðinu síðan í júlílok árið 2017 en kemur nú aftur inn.

Landsliðið verður skipað eftirtöldum leikmönnum á Smáþjóðaleikunum í ár:

Elvar Már Friðriksson · Njarðvík (38 landsleikir)

Dagur Kár Jónsson · Raiffeisen Flyers Wels, Austurríki (2)

Gunnar Ólafsson · Keflavík (10)

Hilmar Smári Henningsson · Haukar (Nýliði)

Halldór Garðar Hermannsson · Þór Þorlákshöfn (Nýliði)

Kristinn Pálsson · Njarðvík (9)

Þórir Guðmundur Þorbjarnarson · Nebraska, USA/KR (5)

Ólafur Ólafsson · Grindavík (28)

Breki Gylfason · Appalachian State, USA (2)

Hjálmar Stefánsson · Haukar (8)

Sigurður Gunnar Þorsteinsson · ÍR (54)

Ragnar Ágúst Nathanaelsson · Valur (40)

Þjálfari: Finnur Freyr Stefánsson

Aðstoðarþjálfari: Baldur Þór Ragnarsson

Þeir leikmenn sem voru við æfingar í hóp en ekki valdir að þessu sinni voru þeir Haukur Óskarsson, Haukum, Ingvi Þór Guðmundsson, Grindavík, Björgvin Hafþór Ríkharðsson, Skallagrím og Sigvaldi Eggertsson, Obradoiro CAB, Spáni.