„Eigum við að óska Liverpool til hamingju með titilinn?“

Pep Guardiola, knattspyrnustjóri Manchester City, var kaldhæðinn í svörum eftir tapið fyrir Norwich City, 3-2, í ensku úrvalsdeildinni í gær.

Liverpool er með fimm stiga forskot á City á toppi deildarinnar eftir fimm umferðir.

„Fimm stig eru fimm stig en það er september,“ sagði Guardiola.

„Hvað eigum við að gera? Óska Liverpool til hamingju með titilinn. Mér dettur ekki í hug að efast um mína menn.“

City hefur þegar tapað fimm stigum í ensku úrvalsdeildinni á þessu tímabili. Á öllu síðasta tímabili tapaði liðið aðeins 16 stigum.

Næsti leikur City er gegn Shakhtar Donetsk í Meistaradeild Evrópu á miðvikudaginn.