Fjögurra marka sigur dugði Szeged ekki til

Stefán Rafn Sigurmannsson skoraði þrjú mörk þegar Pick Szeged vann fjögurra marka sigur á Vardar, 29-25, í seinni leik liðanna í 8-liða úrslitum Meistaradeildar Evrópu í handbolta í kvöld.

Sigurinn dugði ungversku meisturunum skammt því þeir töpuðu fyrri leiknum með átta marka mun, 31-23. Vardar vann einvígið, samanlagt 56-52, og er komið í undanúrslit Meistaradeildarinnar. Þau fara fram í Köln fyrstu helgina í júní.

Kielce tryggði sér einnig sæti í undanúrslitunum í dag, þrátt fyrir níu marka tap fyrir Paris Saint-Germain, 35-26. Kielce vann fyrri leikinn á heimavelli sínum, 34-24, og einvígið 60-59 samanlagt.

PSG var sjö mörkum yfir í hálfleik, 18-11, og vann á endanum níu marka sigur. Það dugði þó ekki til. Nedim Remili skoraði 13 mörk fyrir PSG.

Auk Vardar og Kielce eru Veszprém og Barcelona komin í undanúrslit Meistaradeildarinnar. Aron Pálmarsson, leikmaður Barcelona, verður eini fulltrúi Íslands á úrslitahelginni í Köln.