Ferð Guðmundar Kort til New York reyndist tárvot

Guðmundur Kort fæddist í júlí árið 1950 og ólst upp í Hafnarfirði. Hann var kominn á þrítugsaldur þegar hann heyrði óljósar sögur af því að mögulega væri hann rangfeðraður. Hann fékk það síðan staðfest og hefur í rúm fjörutíu ár reynt að komast að því hver raunverulegur faðir hans sé.

Sigrún Ósk Kristjánsdóttir fór í síðustu viku af stað með þriðju þáttaröð af Leitinni að upprunanum og er fyrsta viðfangsefnið leitin að föður Guðmundar. Guðmundur býr í Hafnarfirði ásamt eiginkonu sinni en saman eiga þau fjórar uppkomnar dætur. Hann er húsasmiður og fyrrverandi slökkviliðsmaður til 25 ára.

Í síðasta þætti kom í ljós að faðir Guðmundar, Dino Lorenzini, lést 22. nóvember 2012 þá 93 ára gamall.

Guðmundur komst aftur á móti í samband við hálfbróður sinn og ætlaði sér að hitta skyldmenni sín í Bandaríkjunum. Aftur á móti hætti hálfbróðir hans allt í einu að svara öllum tölvupóstum og stóð Guðmundur eftir í lausu lofti með sín plön. Hann ákvað samt sem áður að ferðast til New York og reyna að hafa upp á fólk sem gæti tengst honum.

Í þættinum í gær var komið að Bandaríkjaförinni.

Þeir sem hafa ekki séð annan þáttinn í þriðju þáttaröðinni ættu ekki að lesa lengra.

.

.

.

.

.

Það er búið að vara þig við.

.

.

.

.

Þegar Guðmundur var á leiðinni til New York hafði hann ekkert heyrt í systkinum sínum í tvo mánuði. Guðmundur vissi ekki hvað var að valda þögninni. Hvort það væri erfðamál eða eitthvað annað.

Einn daginn þegar Sigrún Ósk var í vinnunni kom í ljós að útvarpskonan Kristín Ruth Jónsdóttir kannaðist nú eitthvað við málið. Þetta var í raun frændfólk hennar. Kristín hafði rætt við fjölskyldu Guðmundar vestanhafs um málið.

Kristín þekkir fjölskyldu Guðmundar vel og lét hún vita af væntanlegri komu þeirra til Bandaríkjanna. Það gekk ekki eins og í sögu og þegar fjölskyldan lagði af stað til New York var ekki komið á hreint hvort Guðmundur væri í raun velkominn.

Guðmundur byrjaði á því að finna fallegan blómvönd til að leggja á leiði föður síns. Þegar í kirkjugarðinn var komið kom í ljós að verkefnið var ærið þar sem mörg hundrað manns eru jarðaðir þar. Eftir mikla leit fann fjölskyldan loks leiði Dino og Ágústu Jónsdóttur, eiginkonu hans. Við það brotnaði Guðmundur Kort niður.

Skyndilega fóru að hrannast inn skilaboð frá systkinum Guðmundar og vildu þau sannarlega hitta týnda bróður sinn. Fyrst fékk Guðmundur að hitta Ritu Lorenzini sem brunaði til hans á bílaplani og féllust þau í faðma. Hún tilkynnti hópnum að þau mættu koma í húsið þar sem Dino fæddist og ólst upp.

Eins ótrúlegt og það hljómar búa Íslendingar í húsinu í dag sem þekktu Dino vel. Guðmundur fékk að vita að Dino hafi aldrei verið hermaður á Íslandi, heldur vann hann á Keflavíkurflugvelli.

Guðmundur vill ekki svekkja sig á þeirra staðreynd að hann náði aldrei að hitta föður sinn.

„Ég hef alltaf hugsað þannig að dagurinn sem er að líða í dag er búinn og kemur aldrei aftur. Þannig hef ég alltaf verið. Við fáum ekki breytt því sem er búið að gerast,“ sagði Guðmundur í þættinum í gær. Hann fékk einnig að hitta John bróður sinn með aðstoð tækninnar í gegnum símann.

„Ég er bæði þreyttur og glaður. Ég held ég sofni bara um leið og legg hausinn á koddann.“

Guðmundur fékk síðan að hitta systkinin sín fimm og mættu þau öll til að hitta þennan nýfundna elsta bróðir sinn. Hann hefur ákveðið að taka sjálfur upp eftirnafnið Lorenzini og verða Guðmundur Kort Lorenzini.

Rúmu ári síðar koma John Lorenzini í heimsókn til Guðmundar. Hann hafði þá ekki heimsótt Ísland frá því að hann var 15 ára. Þeir bræður eiga afmæli með dags millibili þann 25. og 26. júlí. Á afmælisdegi John héldu þeir sameiginlega veislu heima hjá Guðmundi.

Hér að neðan má sjá atriði úr þættinum þegar Guðmundur fann leiði föður síns.