Viðskipti innlent

Ístak undirritar verksamning um smíði stærsta skóla Grænlands

Kristján Már Unnarsson skrifar
Skólabyggingin verður samtals sextán þúsund fermetrar að stærð.
Skólabyggingin verður samtals sextán þúsund fermetrar að stærð. Teikning/Ístak.

Ístak skrifaði nú síðdegis í Nuuk undir ellefu milljarða króna samning um hönnun og smíði stærsta skóla Grænlands, sem jafnframt verður menningarmiðstöð. Þetta er einn stærsti verksamningur í sögu fyrirtækisins og jafnast á við samning þess um smíði Búðarhálsvirkjunar. Þetta kom fram í fréttum Stöðvar 2. 

Byggingin rís við aðalgötuna í Nuuk, við hlið Hótels Hans Egede, en skammt frá eru einnig aðalverslunarmiðstöð bæjarins og skrifstofur landsstjórnar Grænlands. Verksamningurinn hljóðar upp á 615 milljónir danskra króna eða ellefu milljarða íslenskra.

Karl Andreassen, framkvæmdastjóri Ístaks, og Charlotte Ludvigsen, borgarstjóri sveitarfélagsins Sermersooq, sem Nuuk tilheyrir, takast í hendur að lokinni undirritun síðdegis í dag.Mynd/Hermann Sigurðsson.

„Þetta er bara mjög stór samningur. Það má líkja honum til dæmis við samninginn um Búðarhálsvirkjun, þegar hann var undirritaður. Þetta er örlítið minni samningur en það en samt af þeirri stærðargráðu. Og þetta er skóli,“ segir Karl Andreassen, framkvæmdastjóri Ístaks. 

Ístak hefur mesta reynslu íslenskra verktaka af mannvirkjagerð á Grænlandi, allt frá árinu 1970; vann síðast að hafnargerð í Nuuk og hafði áður reist skóla og flestar virkjanir landsins.

Útlitsmynd af skólalóðinni og hluta skólans.Mynd/Ístak.

Nýja skólabyggingin er þriggja ára verkefni og segir Karl að Ístak muni leggja áherslu á að ráða sem flesta heimamenn að smíðinni. Þegar spurt er um fjölda Íslendinga í verkinu segir hann að þeir verði færri en oft áður.

„Við mönnum þetta með yfirstjórnendum, sem eru íslenskir. En það verður eitthvað um íslenska handverksmenn líka,“ segir Karl.

Verkfræðistofan Verkís mun sjá um alla verkfræðihönnun við skólann.

Rými verður fyrir 1.200 nemendur í grunnskólanum. Utan skólatíma nýtast húsakynnin sem menningarmiðstöð bæjarbúa.Mynd/Ístak.

Þetta verður stærsta skólabygging landsins, samtals sextán þúsund fermetrar, og mun bæði þjóna sem leik- og grunnskóli en jafnframt sem íþrótta- og menningarmiðstöð á kvöldin og um helgar fyrir bæjarbúa, sem fá aðgang að svokölluðu hjartarými byggingarinnar og íþróttasal. 

„Þannig má segja að þetta þjóni öllum bæjarbúum, bæði ungum og öldnum,“ segir Karl.

Sjá einnig: Nuuk er engin afdalabyggð

Leikskólinn verður með rými fyrir allt að 120 börn á 1.400 fermetrum.Mynd/Ístak.

Ístak fékk verkið eftir forval og alútboð þar sem lagðir voru saman þrír þættir; verðtilboð, hönnun og útfærsla og áætlaður rekstrarkostnaður byggingarinnar í þrjátíu ár.

„Og samanlagt eru svo gefin stig. Og við unnum þetta verkefni á stigum.“

Karl Andreassen, framkvæmdastjóri Ístaks.Stöð 2/Sigurjón Ólason.

Má ekki líta á þetta sem talsverða viðurkenningu fyrir ykkur?

„Mikla, finnst mér. Það er bara öflugt að fá þetta og sýnir hvað íslenskt fyrirtæki getur verið sterkt í samkeppni, ef undirbúningurinn er góður,“ svarar framkvæmdastjóri Ístaks.

Hér má sjá frétt Stöðvar 2:


Tengdar fréttir

Verkþekking Íslendinga byggir upp innviði Grænlands

Virkjunarframkvæmdir Ístaks, sem nú standa yfir við Diskóflóa á Grænlandi, skila 6-8 milljarða króna tekjum til íslenskra fyrirtækja. Íslensk verkþekking byggir um leið upp innviði Grænlands og segir orkumálastjóri landsins smíði vatnsaflsstöðva hafa gríðarlega þýðingu. Þetta kom fram í þættinum Ísland í dag á Stöð 2 í kvöld, þeim síðari um störf Íslendinga á Grænlandi, en sá fyrri var í gærkvöldi. Virkjunin við Ilulissat telst kannski ekki stór á íslenskan mælikvarða, hún verður 22,5 megavött eða um fjórðungur af stærð Búðarhálsvirkjunar, sem nú er í smíðum.

Íslendingar í klakahöll undir Grænlandsjökli

Virkjun sem Ístak er að smíða á Grænlandi við Diskóflóa lengst norðan heimskautsbaugs er stærsta verkefni í fjörutíu ára sögu fyrirtækisins. Þar er sennilega sú Íslendinganýlenda sem fjærst er öðrum byggðum bólum í sannkallaðri klakahöll við bæinn Ilulissat. Fyrri reynsla Ístaksmanna af smíði virkjana á Grænlandi réð miklu þegar Orkustofnun Grænlands fól þeim einnig þetta tólf milljarða króna verk, þótt þeir ættu ekki lægsta boð.

Virkjunin gæti breyst í ísklump

Virkjanagöng, sem Ístaksmenn bora á Grænlandi langt norðan heimskautsbaugs, liggja í svo köldu bergi að það virkar eins og frystikista. Það er því raunveruleg hætta á því að virkjunin geti frosið og orðið að ísklumpi. Þetta kemur fram í þættinum Ísland í dag á Stöð 2 laust fyrir klukkan sjö í kvöld en þar verður fjallað um þær miklu áskoranir sem mæta íslenskum verktökum og verkfræðistofum við hönnun og smíði virkjunar skammt frá bænum Ilulissat við Diskóflóa.






Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.