Golf

Tíu ár síðan Tiger keyrði á brunahanann, konan mætti með kylfuna og heimurinn komst að hinu sanna

Óskar Ófeigur Jónsson skrifar
Tiger Woods með syni sínum Charlie Axel Woods á tennismóti í New York.
Tiger Woods með syni sínum Charlie Axel Woods á tennismóti í New York. Getty/Gotham/

Í dag er Þakkagjörðarhátíðin í Bandaríkjunum en það var einmitt eftir eina slíka þar sem líf kylfingsins Tiger Woods umturnaðist. Í dag er hann ríkjandi Mastersmeistari en það tók þennan vinsæla kylfing langan tíma að vinna sig til baka eftir örlagaríka nótt fyrir tíu árum síðan.

Tiger Woods var yfirburðamaður í golfheiminum fyrir rúmum áratug og met Jack Nicklaus í risastitlum var þá í mikilli hættu. Þakkagjörðarhátíðin árið 2009 reyndist hins vegar verða Tiger ansi afdrifarík. Um þessar mundir eru liðin tíu ár síðan að einkalíf besta kylfings heims sprakk í andlitið á honum og heimurinn komst að því hvert hið raunverulega líf hans var á bak við tjöldin.

Í tilefni af þessu „afmæli“ árekstursins fyrir utan heimili Tiger Woods hefur ESPN tekið saman helstu atburðina á þessum viðburðaríka og dramatíska áratugi Tigers frá 2009 til 2019.



Tiger Woods lifði tvöföldu lífi og allt komst þetta upp nóttina eftir Þakkagjörðarhátíðina 2009. Tiger keyrði þá undir áhrifum á brunahana og síðan á tré nágrannans rétt fyrir utan heimili sitt.

Elin, kona Tigers notaði golfkylfu til að brjóta afturgluggann á bílnum þar sem Tiger lá meðvitundarlaus. Hann var síðan fluttur á sjúkrahús og var frá keppni fram á næsta ár.

Í framhaldinu komu út fréttir um framhjáhald Tigers og að hjónaband hans væri að enda. Hann sagðist ætla að reyna að bjarga hjónabandinu en tókst það ekki.

Tiger viðurkenndi síðan sjálfur í sjónvarpávarpi í byrjun ársins 2010 að hann hafi átt í fjölda framhjáhalda en hann hafði áður farið í meðferð fyrir kynlífsfíkla.

Það var ekki fyrr en árið 2018 sem Tiger Woods komst aftur á skrið en auk vandræðanna utan golfvallarins þá glímdi hann líka við erfið bakmeiðsli sem háðu honum mikið og kölluðu á hverja aðgerðina á fætur annarri.

Stóra endurkoman var á Mastersmótinu í apríl síðastliðnum þegar Tiger Woods vann glæsilegan sigur. Þetta var fimmtándi sigur hans á risamóti en sá fyrsti frá árinu 2008.

Yfirgerð ESPN er fróðlegur lestur. Tiger Woods var einn allra vinsælasti íþróttamaður heims þegar allt fór í rugl í nóvember 2009 og það hafa mjög margir mikinn áhuga á gengi hans. Þetta sést ekki síst á áhorfi á þau golfmót þar sem hann nær sér á strik.

Hér fyrir neðan má sjá myndband tengdu grein ESPN en þar líka farið yfir söguna í máli og myndum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.