Innlent

Eldsvoði á Eyrinni á Akureyri

Sylvía Rut Sigfúsdóttir skrifar
Ekki er vitað hvort einhver hafi verið í íbúðinni þegar eldurinn kom upp.
Ekki er vitað hvort einhver hafi verið í íbúðinni þegar eldurinn kom upp. Vísir/Tryggvi Páll Tryggvason

Klukkan 05:14 í nótt fengu lögregla og slökkvilið á Akureyri tilkynningu um eld í íbúðarhúsi við Norðurgötu. Strax var ljóst að um mikinn eld var að ræða en húsið er gamalt timburhús og var það í ljósum logum.

Samkvæmt upplýsingum frá lögreglunni á Norðurlandi Eystra hefur erfiðlega gengið að ráða niðurlögum eldsins og leggur talsverðan reyk yfir hluta Oddeyrarinnar. Eru íbúar beðnir að loka gluggum hjá sér meðan þetta ástand varir.

Meðfylgjandi myndband tók fréttamaður okkar á vettvangi. 

Í húsinu eru þrjár íbúðir og náðu íbúar tveggja þeirra að koma sér út. Ekki hefur tekist að staðfesta það hvort að einhver hafi verið inni í þeirri íbúð sem eldurinn kom upp í. Slökkvistarf er enn í gangi á vettvangi. 

Uppfært 08:20 
„Búið er að slökkva eldinn að mestu. Nú er verið að rífa þakið af til að komast að restinni af eldinum,“ segir Vigfús Bjarkason, varðstjóri hjá Slökkviliði Akureyrar í samtali við fréttastofu. Enn er töluverður reykur á svæðinu þó að hann sé að minnka, íbúar eru því beðnir um að hafa glugga áfram lokaða. 

Vigfús segir að ekki sé búið að fara inn í húsið þar sem það sé ekki talið öruggt. Húsið er timburhús klætt með bárujárni og er það ónýtt. Slökkvistarf verður áfram á svæðinu næstu klukkustundirnar og biður Vigfús íbúa að halda sig frá svæðinu og að virða lokanir. 

Uppfært 10:15

Samkvæmt upplýsingum frá slökkviliði hefur fengist staðfest að enginn var í íbúðinni þar sem eldurinn kom upp. 

Vísir/Tryggvi Páll Tryggvason
Vísir/Tryggvi Páll Tryggvason

Fréttin hefur verið uppfærð.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.