Handbolti

Fram skoraði 43 mörk gegn KA/Þór og ÍBV keyrði yfir Aftur­eldingu í síðari hálf­leik

Anton Ingi Leifsson skrifar
Þórey Rósa var frábær í dag.
Þórey Rósa var frábær í dag. vísir/bára

Tveimur leikjum er lokið í Olís-deild kvenna í dag. Silfurliðið frá því á síðustu leiktíð, Fram, rúllaði yfir KA/Þór og Afturelding er enn án stiga eftir tap gegn ÍBV á heimavelli.

KA/Þór náði að fylgja Fram fyrstu tólf mínúturnar en þá var staðan jöfn, 6-6. Heimastúlkur gáfu svo í og leiddu 21-10 í hálfleik.

Í síðari hálfleik gengu þær enn frekar á lagið og enduðu á því að skora 43 mörk gegn átján mörkum gestanna frá Akureyri. Lokatölur 43-18.

Þórey Rósa Stefánsdóttir skoraði ellefu mörk og Ragnheiður Júlíusdóttir, Steinunn Björnsdóttir og Lena Margrét Valdimarsdóttir gerðu allar sjö mörk hver. Hafdís Renötudóttir var með 60% markvörslu.

Martina Corkovic var markahæst hjá KA/Þór. Hún gerði sjö mörk en næst kom Martha Hermannsdóttir. Hún gerði þrjú mörk.

Fram er með fjórtán stig á toppi deildarinnar en Valsstúlkur eiga leik til góða gegn HK á morgun. KA/Þór er með átta stig í fjórða sætinu.

Í Mosfellsbæ vann ÍBV átta marka sigur á Aftureldingu, 31-23, eftir að Afturelding hafði verið einu marki yfir í leikhlé, 11-10. Hrun hjá nýliðunum í síðari hálfleik.

Ásta Björt Júlíusdóttir skoraði tólf mörk fyrir Eyjastúlkur og Sunna Jónsdóttir gerði átta.

Þóra María Sigurjónsdóttir skoraði átta mörk fyrir Aftureldingu og Ragnhildur Hjartardóttir bætti við sex.

Afturelding er á botninum án stiga en ÍBV er með fimm stig í sjötta sæti deildarinnar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.