Phoenix þakkaði Hildi umbreytingu Jókersins í myndinni

Bandaríski leikarinn Joaquin Phoenix segist aldrei hafa orðið fyrir jafnmiklum áhrifum af kvikmyndatónlist og í tilviki tónlistar Hildar Guðnadóttur, sem semur tónlistina í stórmyndinni The Joker. Phoenix fer með titilhlutverkið í myndinni, sem vakið hefur mikla athygli síðustu misseri.

Þetta kom fram í máli Phoenix þegar hann var gestur Jimmy Kimmel í vikunni. RÚV greindi fyrst íslenskra miðla frá ummælunum en klippan með viðtalinu var birt á YouTube á miðvikudag. Viðtalið státar nú af yfir fimm milljónum áhorfa og er á lista yfir vinsælustu YouTube-myndböndin þessa stundina.

Phoenix lýsti því að hann hefði unnið með danshöfundi í tveimur atriðum kvikmyndarinnar, annars vegar þar sem hann dansar í tröppum og hins vegar þegar persóna hans, Arthur Fleck, umbreytist í Jókerinn.

„Sá hluti var í raun viðbrögð við tónlistinni. Todd hafði þá nýlega fengið tónlistina frá Hildi, tónskáldinu, og við vorum að reyna að finna út úr því hvað við ættum að gera við þetta atriði. Hann byrjaði að spila tónlistina fyrir mig og við ákváðum að við vildum eitthvað sem sýndi umbreytinguna yfir í Jókerinn. Það var án orða og þetta er niðurstaðan.“

Kimmel innti Phoenix þá eftir því hvort það tíðkaðist að leikarar fengju að hlusta á tónlist kvikmyndar áður en tökur klárast.

„Nei. Ég veit það eiginlega ekki,“ sagði Phoenix. „En þetta var í fyrsta sinn sem kvikmyndatónlistin hefur svo mikil áhrif á mig.“

Viðtalið má sjá í spilaranum hér að neðan. Umræðan um dansinn og tónlistina hefst u.þ.b. á mínútu 5:30.

Kvikmyndin um Jókerinn hefur verið sögð sláandi og ógnvekjandi og þá hefur Phoenix verið spáð tilnefningu til Óskarsverðlauna fyrir túlkun sína á þessum þekktasta óþokka myndasagnanna. Myndin hefur þó fengið nokkuð dræmar viðtökur hjá nokkrum gagnrýnendum upp á síðkastið, til að mynda hjá gagnrýnendum Guardian og New York Times.

Hildur, sem í september vann til Emmy-verðlauna fyrir tónlist sína í sjónvarpsþáttunum Chernobyl, hefur sjálf fjallað um atriðið sem Phoenix sagði frá í þætti Kimmel. Hún sagði í viðtali við NPR í vikunni að frammistaða Phoenix hefði algjörlega rímað við tilfinningarnar sem hún fann við að semja lagið, sem ber heitið Bathroom Dance.