Erlent

Tugir barna deyja úr beinbrunasótt í Hondúras

Þórgnýr Einar Albertsson skrifar
Á sjúkrahúsi í Managua.
Á sjúkrahúsi í Managua. AP/Alfredo Zuniga

Að minnsta kosti 135 hafa farist í Hondúras úr beinbrunasótt á árinu. Þar af eru um tveir þriðju hlutar börn. Enn er beðið eftir staðfestingu á að fleiri andlát megi rekja til sjúkdómsins í landinu.

Til viðbótar hafa tugir farist í Gvatemala, Mexíkó og Níkaragva og hafa ekki svo margir látið lífið úr veikinni frá árinu 2013. Þá var sóttin verst í Mexíkó og heimti líf 192.

Samkvæmt upplýsingum af vef Landlæknis smitast beinbrunasótt með moskítobiti. Blæðandi beinbrunasótt getur leitt til dauða í um helmingi tilfella ef sjúkdómurinn er ekki meðhöndlaður og eru börn og unglingar í mestri hættu.

„Hér geisar faraldur. Á um fjögurra ára fresti brýst út beinbrunasóttarfaraldur, aðallega vegna lélegs hreinlætis og skorts á fræðslu um sýkt vatn,“ sagði Sara Hernandez, læknir í Hondúras.

Sextán höfðu farist úr veikinni í Hondúras undanfarin fimm ár og þykir kæruleysi hafa gert faraldurinn verri. Fólk sagt hafa leitað læknisaðstoðar of seint. Þá ríkir einnig mikil óreiða í landinu og hefur áformum Juans Hernandez forseta í heilbrigðiskerfinu verið harðlega mótmælt. Hernandez var endurkjörinn árið 2017 og sakaður um kosningasvik.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.