Formúla 1

Atli Jamil Noregsmeistari í torfæru

Bragi Þórðarson skrifar
Atli endaði fjórði og fimmti í keppnum helgarinnar og tryggði sér titilinn.
Atli endaði fjórði og fimmti í keppnum helgarinnar og tryggði sér titilinn. Jamil Racing

Atli Jamil Ásgeirsson tryggði sér Noregsmeistaratitilinn í torfæruakstri um helgina þegar síðustu tvær umferðir mótsins fóru fram í Skien í Noregi.

Mosfellingurinn ákvað fyrir tímabilið að flytja bíl sinn, Thunderbolt, út til að keppa í Noregsmótinu frekar en því íslenska sem Atli hafði endað í öðru sæti í árið áður.

Árangurinn lét ekki á sér standa og landaði Atli titlinum nokkuð örugglega á sunnudaginn þegar lokaumferð mótsins fór fram. Forskot hans var slíkt að Atla dugði aðeins eitt stig í síðustu keppninni til að tryggja titilinn.


Fjölmargir Íslendingar á staðnum

Ætla má að um 100 Íslendingar hafi verið í Skien um helgina að fylgjast með torfærunni. Þrír íslenskir ökumenn voru að keppa en auk Atla kepptu einnig Haukur Viðar Einarsson og Guðmundur Elíasson.

Íslensku ökumönnunum tókust þó ekki að vinna keppni um helgina en stóðu sig þó með stakri prýði. 

Fyrri daginn enduðu þremenningarnir í öðru, þriðja og fjórða sæti en seinni daginn urðu þeir að sætta sig við fjórða, fimmta og sjötta. Það verður þó að teljast frábær árangur þar sem rúmlega tuttugu bílar voru skráðir til leiks.



Thunderbolt seldur

Atli Jamil Ásgeirsson hefur ákveðið að leggja stýrið á hilluna eftir fimm ár í torfærunni. Ferillinn byrjaði í Skien árið 2015 þegar Atli keypti bílinn af Normanninum Roar Johansen og endar á sama stað fimm árum seinna.

Auk Noregsmeistaratitlinum í ár vann Atli einnig Heimsmeistaratitilinn í torfæru árið 2018 þegar keppt var á Egilsstöðum.

Atli er fyrsti íslenski ökumaðurinn til að tryggja sér Noregsmeistaratitilinn síðan Gísli Gunnar Jónsson gerði það árið 2006 á Steranum, bíl sem flestir þekkja sem Kókómjólkin.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.