Golf

Guðmundur endaði þrettándi í Frakklandi

Ástrós Ýr Eggertsdóttir skrifar
Guðmundur Ágúst hefur náð afar góðum árangri á Nordic Golf-mótaröðinni í ár og er nú byrjaður að reyna fyrir sér á Áskorendamótaröðinni
Guðmundur Ágúst hefur náð afar góðum árangri á Nordic Golf-mótaröðinni í ár og er nú byrjaður að reyna fyrir sér á Áskorendamótaröðinni mynd/gsí/seth

Guðmundur Ágúst Kristjánsson endaði í 13. sæti Open de Bretagne mótsins í golfi sem er hluti af Áskorendamótaröð Evrópu. Birgir Leifur Hafþórsson varð í 31. sæti.

Þeir Guðmundur Ágúst og Birgir Leifur höfðu verið jafnir allt mótið en það breyttist í dag þegar Guðmundur Ágúst spilaði heldur betri hring heldur en Birgir Leifur.

Guðmundur byrjaði hringinn ekki sérlega vel, fékk einn fugl en þrjá skolla á fyrstu fimm holunum. Hann fékk fugl á sjöundu holu og kláraði fyrri níu því á einu höggi yfir pari. Seinni níu holurnar fóru heldur betur, þá sló Guðmundur fyrir þremur fuglum og var skollalaus.

Samtals spilaði hann því hringinn í dag á tveimur höggum undir pari sem skilaði honum á fjögur högg undir par í mótinu.

Birgir Leifur byrjaði líka illa í dag og fékk hann þrjá skolla á fyrstu níu holunum. Fyrsti og eini fugl hrings Birgis Leifs kom á 13. holu og kláraði hann hringinn á tveimur höggum yfir pari. Það þýddi að hann endar mótið á pari eftir fjóra hringi.

Allir kylfingar hafa lokið leik á mótinu og klárði Guðmundur Ágúst í 13. - 19. sæti. Birgir Leifur þurfti að sætta sig við 31. - 33. sæti.

Sigurvegari mótsins var Þjóðverjinn Sebastian Heisele, hann spilaði hringina fjóra á þrettán höggum undir pari.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.