Elvar markahæstur í sigri Skjern

Elvar Örn Jónsson var markahæstur í liði Skjern sem vann Lemvig-Thyborøn, 34-27, í 2. umferð dönsku úrvalsdeildarinnar í handbolta í kvöld. Elvar skoraði sjö mörk og gaf tvær stoðsendingar.

Slut: Skjern vinder 34-27. Elvar topscorer med syv mål. #skjernhåndboldpic.twitter.com/LchHEcYuNY

— Skjern Håndbold (@SkjernHaandbold) September 9, 2019

Elvar náði sér ekki á strik í tapi fyrir SønderjyskE, 27-25, í 1. umferðinni en hann spilaði mun betur í kvöld og stimplaði sig almennilega inn í dönsku deildina.

Björgvin Páll Gústavsson varði fjögur skot í marki Skjern. Patrekur Jóhannesson er þjálfari liðsins.

SønderjyskE átti enga möguleika gegn Bjerringbro-Silkeborg og tapaði með ellefu marka mun, 32-21.

Arnar Birkir Hálfdánsson skoraði eitt mark fyrir SønderjyskE en Sveinn Jóhannsson komst ekki á blað.