Innlent

Segja starf­seminni stefnt í voða ef fé­lagið lendir í mála­ferlum við fé­lags­menn

Sylvía Hall skrifar
Lyklar að fjórum íbúðum voru afhentir í kvöld.
Lyklar að fjórum íbúðum voru afhentir í kvöld. Vísir/Friðrik
Stjórn félags eldri borgara fundaði í kvöld vegna íbúða við Árskóga sem hafa verið í umræðunni síðustu daga. Kostnaður við byggingu íbúðanna fór rúmlega 400 milljónum króna fram úr áætlun og bættust því fimm til sjö milljónir á kostnaðarverð hverrar íbúðar.

Sjá einnig: Vilja milljóna aukagreiðslu frá eldri borgurum vegna nýrra íbúða í Breiðholti

Í tilkynningu frá félaginu segir að það sé óneitanlega slæmt að kaupendur hafi fengið þennan bakreikning eftir að gengið var frá sölu. Hins vegar hafi meirihluti kaupenda samþykkt skilmálabreytinguna eftir að fundað var með þeim.

Kaupendur sautján íbúða samþykktu að greiða þann kostnað sem féll á íbúðirnar eftir kaupsamning. Kaupendur fjögurra vilja skoða réttarstöðu sína frekar og tveir hafa lýst því yfir að þeir íhugi að leita réttar síns fyrir dómstólum. Almennt hafi fólk þó sýnt málinu skilning.  

Ekki hagnaðardrifið verkefni 

Félag eldri borgara byggir afkomu sína nær alfarið á félagsgjöldum eftir því er segir í tilkynningunni. Þau selji íbúðirnar á kostnaðarverði og því sé nærtækast að líta á verkefnið sem nokkurs konar byggingarfélag þeirra sem vilja kaupa íbúðirnar.

Í tilkynningunni segir að ummæli lögmanna í fjölmiðlum bendi til þess að þeir haldi að um hefðbundinn fasteignaviðskipti sé að ræða. Stjórn félagsins segir svo ekki vera.

„Þegar framkvæmdir hófust lá fyrir listi með nöfnum rúmlega fjögur hundruð félagsmanna sem lýstu yfir áhuga. Þannig gat félagið fengið lánsloforð frá bankanum sem þurfti til framkvæmdarinnar. FEB tók að sér hlutverk milliliðar án nokkurrar þóknunar í samræmi við markmið og tilgang félagsins.“

Þá er tekið fram að helsti tilgangur félagsins sé að stuðla að bættum kjörum eldri borgara og velferð þeirra. Því hlutverki yrði stefnt í voða færi svo að félagsmenn færu að leita réttar síns fyrir dómstólum.

„Tilgangur og starfsemi félagsins; svo sem að berjast fyrir hagsmunum eldri borgara, stuðla að félagslegri virkni þeirra og velferð, væri stefnt í voða, ef félagið lendir í erfiðum og löngum málaferlum við félagsmenn sína.“

Lögmaður segir breytingarnar ekki eðlilegar 

Í kvöldfréttum Stöðvar 2 var rætt við Víði Smára Pedersen, aðjúnkt í kröfurétti við Háskóla Íslands, sem sagði málflutning félagsins skjóta skökku við. Allt tal um að dómstólaleiðin væri tímafrek og kostnaðarsöm væri ekki rétt.

Þá hafi félagið sjálft gefið í skyn að það hafi í sjálfu sér engar varnir, þau hafi einfaldlega biðlað til sinna félagsmanna um að koma til móts við þessa hækkun.

„Ef þú viðurkennir þá skyldu sem er búið að höfða dómsmál um þá er ekkert dómsmál til staðar. Það dómsmál mun ekki taka nema einn dag og vera frekar ódýrt í rekstri af því ef að þú viðurkennir bara skyldu þína til að afhenda fasteignina þá er náttúrlega ekkert dómsmál,“ sagði Víðir.


Tengdar fréttir

Segir FEB beita vafasömum vinnubrögðum

Hæstaréttarlögmaður segir Félag eldri borgara í Reykjavík og nágrenni, FEB, beita vafasömum vinnubrögðum með því að krefja kaupendur íbúða fyrir aldraða í Árskógum um hærra kaupverð.




Fleiri fréttir

Sjá meira


×