Golf

Tiger Woods hefur leik löngu áður en áhorfendum verður hleypt inn

Óskar Ófeigur Jónsson skrifar
Það er örugglega langt síðan að  Tiger Woods spilaði holur í golfmóti án þess að hafa áhorfendur.
Það er örugglega langt síðan að Tiger Woods spilaði holur í golfmóti án þess að hafa áhorfendur. Vísir/ Mike Lawrie

Enginn áhorfandi færi tækifæri til að fylgjast með fyrstu holunum hjá nokkrum af stærstu nöfnunum í golfheiminum þegar keppni hefst í FedEx bikarnum á Northern Trust golfmótinu.

Ástæðan er þrumuveður sem gekk yfir svæðið seint á miðvikudagskvöldið eða aðeins nokkrum klukkutímum áður en keppnin átti að byrja en mótið er spilað hjá Liberty National golfklúbbnum í Jersey City í New Jersey fylki.

Mikill vindur og rigning skemmdu hluta af byggingum við völlinn sem og veitingatjöldin sem áttu að þjóna áhorfendum. Enginn slasaðist en mótshaldarar þurfa tíma til að laga til eftir storminn.



Það var tekinn sú ákvörðun að kylfingar muni hefja leik á réttum tíma, klukkan sjö um morguninn að staðartíma, en að mótshaldarar fái að nýta morguninn til að laga til.

Engum áhorfanda verður því hleypt inn á svæðið fyrr en klukkan tíu eða þremur tímum eftir að fyrstu kylfingar fara út.

Meðal þeirra stórstjarna sem byrja að spila án þess að hafa áhorfendur eru Tiger Woods, Brooks Koepka og Rory McIlroy. Tiger hefur leik klukkan 7.43 og spilar því lengst af þessum þremur án þess að hafa áhorfendur.

Þetta verður örugglega mjög sérstakt fyrir Tiger Woods sem er gríðarlega vinsæll kylfingur og nær öruggt að flestir áhorfendur safnist í kringum holuna sem hann er að spila hverju sinni.

„Við erum að stunda íþrótt sem fer fram utanhúss. Móðir náttúra kemur stundum í heimsókn og breytir okkar plönum. Við erum þakklát fyrir að enginn slasaðist og að við getum lagað það sem skemmdist. Okkur hlakkar til að taka á móti bestu kylfingum heims sem og öllum áhorfendunum sem hafa beðið eftir þessu móti allt þetta ár,“ sagði Julie Tyson, framkvæmdastjóri The Northern Trust í tilkynningu.

Northern Trust golfmótið er það fyrsta af þremur í úrslitakeppninni um FedEx bikarinn. 70 efstu kylfingarnir af þeim 125 sem keppa á Northern Trust golfmótinu komast áfram á næsta mót sem er BMW Championship. Aðeins 30 komast síðan á lokamótið sem er Tour Championship og fer fram nærri Atlanta í Georgíu fylki.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.