Golf

Forseti GSÍ: Á alþjóðlegum mælikvarða er mjög ódýrt að leika golf

Anton Ingi Leifsson skrifar

Kylfingum á Íslandi fjölgaði um fjögur prósent á síðasta ári á landsvísu en þetta kemur fram í tölum sem Golfsamband Íslands greindi frá í gær.

Í heildina eru nú 17.589 kylfingar skráðir í golfklúbba landsins en ekki hefur verið jafn mikil fjölgun í kylfingum frá því árið 2009.

Haukur Örn Birgisson, forseti GSÍ, segir að það séu margar ástæður fyrir því að þessi aukning hafi átt sér stað.

„Þetta er samspil af mikilli og góðri kynningu sem golfið hefur fengið undanfarin ár, árangri okkar bestu kylfinga, umfjöllun í fjölmiðlum um golf og veðri,“ sagði Haukur í kvöldfréttum Stöðvar 2.

„En þegar öllu er á botninn hvolft held ég að golfklúbbarnir séu að standa sig býsna vel í að kynna íþróttina og vonandi við hjá GSÍ líka. Við fáum fleiri til að skrá sig til leiks og það hefur tekist svona vel á þessu ári.“

Mesta fjölgunin var í tveimur hópum; níu ára og yngri og svo 60 ára og eldri.

„Það er fjölgun í 60 ára og eldri sem hefur sýnt það sem við höfum verið að reyna að koma á framfæri að þetta er lýðheilsusport. Okkar kylfingar geta verið að spila golf langt fram eftir aldri sem er einstakt hvað golfið varðar. Það er ánægjulegt að sjá þá fjölgun og það sýnir að það er hægt að stunda þetta endalaust.“

Umræða um að það sé of dýrt að stunda golf hefur oft verið á yfirborðinu en Haukur gefur lítið fyrir þær fullyrðingar.

„Auðvitað kostar öll afþreying peninga en sé þetta sett í samhengi við aðrar íþróttagreinar eða aðra afþreyingu þá verð ég að vera ósammála því að það sé dýrt að byrja í golfi.“

„Ég myndi segja að á alþjóðlegum mælikvarða er mjög ódýrt að leika golf og það er ástæðan fyrir því að við erum sú þjóð í heiminum sem hefur lang flesta kylfinga varðandi höfðatölu.“

Fréttina má sjá í heild sinni í sjónvarpsglugganum hér að ofan.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.