Innlent

Á fullum launum hjá borginni grunaður um endurtekin brot gegn börnum

Kolbeinn Tumi Daðason skrifar
Sálfræðingurinn er til rannsóknar grunaður um að hafa brotið á dreng á fermingaraldri fyrir yfir áratug,.
Sálfræðingurinn er til rannsóknar grunaður um að hafa brotið á dreng á fermingaraldri fyrir yfir áratug,. Vísir/Vilhelm

Sálfræðingur sem dæmdur var í tveggja og hálfs árs fangelsi á dögunum fyrir að brjóta kynferðislega á fyrrverandi sjúpdóttur sinni er til rannsóknar hjá lögreglunni á Ísafirði grunaður um að hafa nauðgað dreng í áttunda bekk. Drengurinn var skjólstæðingur sálfræðingsins. Málið var kært til lögreglu árið 2014 en leiddi ekki til ákæru.

Sálfræðingurinn hefur starfað með börnum og unglingum í áratugi. Meðal annars sem meðferðarfulltrúi og fræðslustjóri í stóru sveitarfélagi. Hann upplýsti ekki um áratuga gamla kæru á hendur sér fyrir að nauðga drengnum þegar hann réð sig til Reykjavíkurborgar í ágúst 2017.

Í framhaldi af því að hann var kærður fyrir að brjóta á stjúpdóttur sinni í desember 2017 var hann færður til í starfi. 

Nokkrum vikum síðar, eftir að kæran hafði verið skoðuð og yfirmönnum á velferðarsviði bárust upplýsingar um fyrri kæruna á hendur honum, var hann sendur í leyfi.

Ekki var þó gengið frá ráðningarlokum við hann fyrr en nú í maí eða sextán mánuðum eftir að hann var sendur í leyfi. Hann hefur verið á fullum launum allan þann tíma að því er fram kemur í svari velferðarsviðs borgarinnar við fyrirspurn Vísis.

Ný sakargögn

Drengurinn, sem er um þrítugt í dag, segir sálfræðinginn hafa nauðgað sér þegar hann var í sálfræðimeðferð hjá honum í 8. bekk, fyrir endurupptöku máls síns bar loks árangur í september síðastliðnum. Þá ákvað ríkissaksóknari að taka málið upp að nýju og senda það í rannsókn hjá lögreglu. Lögreglan á Ísafirði fer með rannsókn málsins.

Ríkissaksóknari taldi málið á sínum tíma ekki líklegt til sakfellingar og var það því fellt niður. Endurupptakan er á grundvelli þriðju málsgreinar 57. greinar laga um meðferð sakamála. Þar segir að ekki eigi að endurupptaka mál nema ný sakargögn komi fram eða líkur á að þau komi fram. Sakargögn geta verið ýmis konar nýjar upplýsingar svo sem framburður vitna.

Ungi maðurinn tjáði Vísi í viðtali í fyrra að honum þætti erfiðast að hugsa til þess að ef kæra hans hefði leitt til ákæru þá hefði sálfræðingurinn kannski aldrei náð að brjóta á öðru barni.

Kók og prins póló

Það var í október 2014 sem karlmaðurinn lagði fram kæru á hendur sálfræðingnum fyrir nauðgun um áratug fyrr. Málið var rannsakað með hliðsjón af 1. mgr. 202. gr. hegningarlaga nr. 19/1940, sem fjallar um kynferðisbrot gegn börnum. Drengurinn er greindur með einhverfu og var lagður í einelti í grunnskóla. Af þeim sökum var hann látinn hitta skólasálfræðing.

Í gögnum málsins kemur fram að ungi maðurinn hafi tjáð lögreglu að sálfræðingurinn hefði nauðgað honum alls þrisvar, á sennilega þriggja mánaða tímabili og alltaf á skrifstofu skólasálfræðingsins. Í lok sálfræðitíma hafi hann hrósað honum og gefið honum kók og prins póló.

Kærandinn segir að sálfræðingurinn hafi sagt að þetta ætti að vera þeirra leyndarmál. Einnig að ef hann segði frá myndi enginn trúa honum og hann yrði bara lagður inn á geðdeild.

Íhugaði oft sjálfvíg

Ungi maðurinn lýsti því í samtali við Vísi í fyrra hvernig honum hafi fundist hann deyja að innan í þessum tímum. Hann hafi skammast sín og fundist hann eiga þetta skilið þar sem hann hafi ekki reynt að streitast á móti. Eftir þetta hafi hann oft íhugað sjálfsvíg.

Hann hefur síðan þá leitað til fjölda sálfræðinga og einnig fengið aðstoð frá Stígamótum. Segir hann þetta hafa haft áhrif á sjálfsmynd, kynlíf, samskipti hans og traust til annarra. Hann hafi aldrei verið í sambandi, ekki fundist hann sjálfur þess virði.

Sálfræðingurinn hefur alla tíð neitað sök og gerði enn þegar Vísir hafði samband við hann. Hann vildi ekkert tjá sig um málið í samtali við Vísi í fyrra.

Ungi maðurinn hringdi nokkur símtöl til sálfræðingsins í aðdraganda þess að hann lagði fram kæruna. Sálfræðingurinn tilkynnti þau til lögreglu og sagði unga manninn í ójafnvægi. Ungi maðurinn tjáði Vísi að hann hefði hringt í manninn uppfullur af reiði eftir kynferðisbrotin.

Konum ekki sagt óhætt í ráðgjöf hjá honum

Sálfræðingurinn sendi tölvupóst á starfsmenn sveitafélagsins sem hann starfaði hjá árið 2010 þar sem hann varaði við gróusögum þess efnis að konum væri ekki óhætt í ráðgjöf hjá honum þar sem hann leitaði á þær.

Vísir hefur bréfið undir höndum en það er frá lokum sumars 2010. Þar segir sálfræðingurinn meðal annars að einstaklingur hafi sent fólkinu í kringum hann tölvupósta og SMS með ljótum sögum og einnig rætt það í eigin persónu við einhverja aðila.

Í póstinum segir sálfræðingurinn söguna vera fjarstæðu. Aðili sem starfaði með manninum á sínum tíma tjáði Vísi að flestir hefðu talið að gróusögurnar sneru að því hve kvensamur sálfræðingurinn væri.

Breytt ráðningarferli hjá velferðarsviði

Sálfræðingurinn starfaði á deild hjá Reykjavíkurborg sem sá meðal annars um ráðgjöf til leik- og grunnskóla. Eftir að sálfræðingurinn var sendur í leyfi frá störfum sínum hjá velferðarsviði Reykjavíkurborgar í fyrra var gerð ítarleg athugun á verkefnum sálfræðingsins til að tryggja að hann hefði ekki farið út fyrir starfsskyldur sínar og verið einn með börnum.

„Niðurstaða athugunarinnar var að í einu tilviki hafi viðkomandi verið einn með barni í fimmtán mínútna viðtali. Samkvæmt upplýsingum frá yfirmanni hafa engar athugasemdir né kvartanir borist um störf mannsins hjá velferðarsviði en rétt er að geta þess að hann gegndi því starfi sem hann var ráðinn til einungis í fjóra mánuði,“ sagði í yfirlýsingu frá Reykjavíkurborg.

Í framhaldinu var gerð breyting á ráðningarferli á velferðarsviði þar sem ákveðið var að óska eftir upplýsingum úr sakaskrá hjá þeim sem starfa á heimilum og dagþjónustu fyrir fatlað fólk eða í úrræðum á vegum Barnaverndar og þeim sem starfa við stuðningsþjónustu. Áður hafði verið gerð krafa um hreint sakavottorð.

Veistu meira um málið? Hafðu samband við kolbeinntumi(hja)stod2.is. Fullum trúnaði er heitið.


Tengdar fréttir

Kanna hvort maðurinn hafi verið einn með börnum í starfi

Velferðarsvið Reykjavíkurborgar skoðar hvort afla eigi vottorða úr sakaskrá við ráðningar í öll störf á sviðinu. Ráðgjafi hjá sviðinu var kærður fyrir kynferðisbrot gegn barni í desember og hafði áður verið kærður.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.