Bjarki Már Sigvaldason er látinn 32 ára að aldri. Hann féll frá á fimmtudaginn eftir harða baráttu við krabbamein. Bjarki Már lætur eftir sig eiginkonu, Ástrós Rut Sigurðardóttur, og tíu mánaða gamla dóttur þeirra Emmu Rut.

Bjarki Már hafði barist við krabbamein í hartnær sjö ár en hann greindist 25 ára gamall með krabbamein í ristli. Barátta hans var aðdáunarverð og vakti mikla athygli sem og einlæg frásögn þeirra hjóna af veikindunum og ferlinu sem þeim fylgir.

Í viðtali við Ísland í dag í vetur sögðu Ástrós og Bjarki sögu sína og ræddu veikindin. Þá var orðið ljóst að um það bil fimm æxli væru komin víðs vegar um heilann sem ekki væri hægt að skera á brott. Var þeim tilkynnt að aðeins nokkrir mánuðir væru eftir.

„Það er það eina sem ég hugsa um núna. Að vakna á hverjum degi og lifa einn dag í einu,“ sagði Bjarki.

Innslagið má sjá hér að neðan.

Bæði Ástrós og Bjarki voru öflug í baráttunni fyrir krabbameinsveika og vitundarvakningu í kringum sjúkdóminn.

Ástrós var um tíma formaður Krafts, félags ungs fólks sem greinst hefur með krabbamein og aðstandendur þeirra.

Vakti það mikla athygli þegar hún vakti máls á þeim mikla kostnaði sem fylgir veikindunum. 

Klár, góðhjartaður og yndislegur pabbi 

Fjölskyldumeðlimir Bjarka minnast hans í dag með hlýhug. Í einlægri færslu þakkar Ástrós honum fyrir að hafa komið inn í líf sitt, hún hafi orðið ástfangin við fyrstu sýn og sé það enn í dag. Góðu minningarnar munu fylgja henni og dóttur þeirra alla tíð. 

„Ég ætla að standa mig í stykkinu fyrir þig, ég mun ala upp Emmu eftir okkar lífsgildum alveg eins og við töluðum um og mun ávallt passa uppá að hún eigi fullt af fallegum minningum um þig.“

Faðir Bjarka segir hann hafa gert meira á þeim sjö árum sem hann háði baráttuna við meinið en margur gerir yfir ævina. Hann hafi þó fyrst og fremst kennt fólkinu í kringum sig margt, að gefast aldrei upp og lifa og njóta eins og hægt var.

„Hann er fyrirmyndin mín og gerði fólk betra sem umgegst hann. Hans verður sárt saknað en hann lifir áfram í gegnum dóttur sína og er það mikil blessun,“ skrifar faðir hans og þakkar fyrir stuðninginn undanfarin ár.

Bræðurnir Vilhjálmur og Þórhallur Siggeirssynir tóku sig til í vor og bjuggu til myndband þar sem farið var yfir fótboltaferil Bjarka en hann þótt gríðarlegt efni á sínum tíma. Þar er m.a. rætt við samherja og mótherja hans úr yngri flokkunum sem og þjálfara hans, bæði hjá HK og yngri landsliðunum. Myndbandið má sjá að neðan.