Innlent

Lögreglan vill skoða að nota bílaleigubíla til neyðaraksturs

Kjartan Kjartansson skrifar
Óskað hefur verið eftir því að ríkisendurskoðandi skoði rekstur lögreglubifreiða.
Óskað hefur verið eftir því að ríkisendurskoðandi skoði rekstur lögreglubifreiða. Vísir/Eyþór

Ríkislögreglustjóri hefur óskað eftir því við ríkisendurskoðanda að skoðaðar verði heimildir lögreglunnar til þess að taka á leigu bílaleigubíla sem auðkenndir yrðu sem lögreglubílar og skráðir til neyðaraksturs. Óskin er hluti af beiðni lögreglunnar um stjórnsýsluendurskoðun á rekstri bílamiðstöðvar ríkislögreglustjóra.

Í tilkynningu frá ríkislögreglustjóra kemur fram að bílamiðstöðin eigi og reki ökutæki lögreglunnar í landinu. Samkvæmt lögum um ríkisendurskoðanda feli stjórnsýsluendurskoðun í sér mat á frammistöðu þeirra aðila sem embættið hefur eftirlit með.

Markmið endurskoðunarinnar sé að stuðla að úrbótum þar sem einkum sé horft til meðferðar og nýtingar ríkisfjár, hvort hagkvæmni og skilvirkni sé gætt í rekstri stofnana og fyrirtækja í eigu ríkisins og hvort framlög ríkisins skili þeim árangri sem að er stefnt. Einnig sé litið til þess hvort starfsemi sé í samræmi við fjárheimildir, löggjöf sem gildir um hana og góða og viðurkennda starfshætti.

„Jafnframt óskaði ríkislögreglustjóri sérstaklega eftir því að skoðað verði hvaða áhrif framkvæmd laga um opinber fjármál nr. 123/2015 hefur haft á rekstur og endurnýjun ökutækja lögreglu. Þá er óskað eftir því að skoðaðar verði heimildir lögreglunnar til þess að taka á leigu bílaleigubifreiðar til notkunar, auðkenna sem lögreglubifreiðar og skrá til neyðaraksturs,“ segir í tilkynningunni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.