Google takmarkar aðgang Huawei að Android

Tæknirisinn Google, sem meðal annars framleiðir Android stýrikerfið sem stjórnar flestum farsímum heimsins, hefur ákveðið að verða við skipun Bandaríkjaforseta um að stunda ekki viðskipti við Huawei, stærsta farsímaframleiðanda Kína, nema með sérstöku leyfi frá Bandaríkjastjórn.

Þetta þýðir að Huawei-síma verður ekki hægt að uppfæra og aðgangur að ýmsum smáforritum í símana tapast. Til að mynda er áætlað að ekki verði hægt að nota YouTube eða Google Maps eftir ákvörðunina.

Þá er útlit fyrir að Huawei símar verði einfaldlega ekki með Android stýrikerfið þegar það verður uppfært í heild sinni á næsta ári. Huawei mun þó áfram geta notast við þá útgáfu Android sem er opin öllum (e. open source licence), en Google mun þó ekki reiða fram neina tæknilega aðstoð.

Örgjörvaframleiðendur á borð við Qualcomm, Xilinix og Broadcom hafa tjáð starfsmönnum sínum að þau muni ekki versla frekar við Huawei, þangað til annað er tekið fram, ef marka má fréttir Bloomberg af málinu.



Sjá einnig: Hóta hefndum vegna Huawei-banns

Richard Wu, yfirmaður neytendamála hjá Huawei, sagði í samtali við Die Welt í mars að félagið væri reiðubúið, færi svo að það gæti ekki lengur notast við bandarískan hugbunað. „Við erum búin að hanna okkar eigin stýrikerfi. Komi einhvern tímann til þess að við getum ekki notast við þessi [bandarísku] kerfi þá erum við tilbúin.“

Framkvæmdastjóri Huawei tók í sama streng í viðtali um helgina. Félaginu myndi vegna „vel“ án bandarískra íhluta. Hvíslað hefur verið um það í tæknigeiranum síðustu mánuði að Huawei hafi sankað að sér örgjörvum og öðrum bandarískum íhlutum, færi svo að steinn yrði lagður í götu félagsins.

Ætla má að ekki verði undið ofan af þessari stöðu nema Kínverjar og Bandaríkjamanna grafi stríðöxina, en þeir berjast nú hatrammt á viðskiptasviðinu og keppast við að hækka innflutningstolla á vörur hvers annars.