Viðskipti innlent

„Réttarfarsleg klemma“ í máli ALC og Isavia

Kjartan Kjartansson skrifar
Vél WOW air TF-GPA hefur verið kyrrsett á Keflavíkurflugvelli frá því í mars.
Vél WOW air TF-GPA hefur verið kyrrsett á Keflavíkurflugvelli frá því í mars. Vísir/Vilhelm

Lögmenn bandarísku flugvélaleigunnar ALC og Isavia tókust enn á um farþegaflugvél sem Isavia kyrrsetti til að tryggja skuldir Wow air í Héraðsdómi Reykjaness í dag. Leigan krefst þess að Isavia afhendi þotuna en Isavia vill bíða úrskurðar Landsréttar um fyrra mál. Lögmaður ALC segir málið í „réttarfarslegri klemmu“.

Isavia kyrrsetti farþegaþotu í eigu ALC þegar Wow air varð gjaldþrota í lok mars sem tryggingu fyrir skuldum fallna flugfélagsins vegna flugvallargjalda og annarrar þjónustu á Keflavíkurflugvelli.

ALC lagði í kjölfarið fram aðfararbeiðni um miðjan apríl þar sem fyrirtækið krafðist þess að Isavia léti vélina af hendi. Héraðsdómur Reykjaness úrskurðaði í byrjun maí að Isavia hafi verið heimilt að kyrrsetja þotuna en aðeins vegna gjalda sem tengdust þotunni sjálfri, ekki fyrir allri skuld Wow air sem sögð er um tveir milljarðar króna.

Isavia kærði úrskurð héraðsdóms frá 2. maí til Landsréttar.

Eftir að úrskurðurinn í héraði lá fyrir greiddi ALC Isavia um 87 milljónir króna sem flugvélaleigan taldi að væri sá hluti skuldar Wow air sem væri tilkominn vegna þotunnar. Þá lagði það fram aðra aðfararbeiðni um að fá þotuna afhenta.

Oddur Ástráðsson, lögmaður ALC. Vísir/Vilhelm

Isavia segist enn hafa rétt til tryggja alla skuldina

Tekist var á um seinni aðfararbeiðnina í Héraðsdómi Reykjaness í dag. Oddur Ástráðsson, lögmaður ALC, segir að fyrirtækið telji sig hafa forræði til að haga sér í samræmi við forsendur fyrri úrskurðar héraðsdóms.

Isavia hafi ekki rétt á að kæra úrskurðinn til Landsréttar til að reyna að fá forsendum hans hnekkt.

„Þetta er svona réttarfarsleg klemma má segja sem málið er í sem verður væntanlega leyst úr á næstu dögum,“ segir Oddur sem telur að næst á dagskrá sé að undirbúa skaðabótamál gegn Isavia vegna tjóns sem ALC hafi orðið fyrir vegna kyrrsetningarinnar.

Grímur Sigurðsson, lögmaður Isavia. Vísir/Vilhelm

Grímur Sigurðsson, lögmaður Isavia, segist hafa öll sömu rök uppi og þegar upphaflega aðfararbeiðnin var tekin fyrir. Isavia telji sér heimilt samkvæmt lögum að aftra för loftfars þar til öll skuld umráðamanns þess hafi verið greidd. Óumdeilt sé að hún hafi ekki verið greidd að fullu og á meðan megi Isavia aftra för þotunnar.

Málið segir hann snúast um tvennt í grófum dráttum. Annars vegar hvort að ALC geti höfðað tvö mál á sama tíma og hins vegar hvort að greiðslan sem fyrirtækið innti af hendi sé nóg til að fá þotuna lausa.

Varðandi féð sem ALC greiddi Isavia segir Grímur að upphæðin hafi byggst á útreikningi flugvélaleigunnar á skuld Wow air vegna þotunnar. Isavia telji hins vegar vonlaust að sjá af þeim útreikningum hvort það sé rétt. Ítarlegri greiningar sé þörf en hægt sé að gera í aðfararbeiðni af þessu tagi.

„Isavia hefur ekki farið í þá vinnu af því að Isavia telur að þeir útreikningar skipti ekki máli því allur málflutningurinn byggir á því að flugvélin tryggi alla skuldina,“ segir Grímur.


Tengdar fréttir

ALC segist hafa tapað 67 milljónum vegna kyrrsetningar Isavia

Bandaríska flugvélaleigufyrirtækið ALC segist hafa tapað sem nemur 67 milljónum króna vegna kyrrsetningar Isavia á farþegaþotu sem WOW air var með á leigu. Eftir tíu daga nemi tapið sömu upphæð og WOW air skuldaði vegna vélarinnar.

Saka lögmann ALC um dylgjur í garð stjórnenda Isavia

Upplýsingafulltrúi Isavia segir að Oddur Ástráðsson, lögmaður flugvélaleigusalans ALC, nýti sér fjölmiðla til að bera á borð fullyrðingar sem ekki standist skoðun. Hann fari af stað með dylgjur í garð þeirra stjórnenda sem tekið hafi erfiðar ákvarðanir fyrir hönd Isavia vegna WOW air.

Isavia kærir úrskurðinn

Isavia hefur kært úrskurð Héraðsdóms Reykjaness í mál félagsins gegn Air Lease Corporation (ALC) til Landsréttar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*

Mesta lækkun dagsins


Félag
Br.%
Fjöldi
Velta*
Velkomin á Vísi. Þessi vefur notar vafrakökur. Sjá nánar.