Guðjón Valur funheitur í sigri

Rhein-Neckar Löwen er með 50 stig í þriðja sæti þýsku úrvalsdeildarinnar eftir sigur á Göppingen, 33-27, á heimavelli í kvöld.

Guðjón Valur Sigurðsson átti flottan leik í kvöld. Hann skoraði sex mörk úr átta skotum en markahæstur var Andy Schmid með tólf mörk. Alexander Petersson var ekki í hópnum.

Löwen er með 50 stig í þriðja sætinu en Kiel er í öðru sætinu með 56 stig. Flensburg vann öruggan sigur á Stuttgart i kvöld og er með 60 stig á toppnum.

Aðalsteinn Eyjólfsson og lærisveinar hans í Erlangen töpuðu á útivelli, 26-25, fyrir Leipzig eftir að hafa verið 14-12 yfir í hálfleik. Erlangen er í níunda sæti deildarinnar.