Viðskipti erlent

Hlé á erjum Trump við Kanada en stigmögnun gagnvart Evrópu

Kjartan Kjartansson skrifar
Trump hefur lagt verndartolla á ýmsar innfluttar vörur á grundvelli skýrslna sem hann hefur látið viðskiptaráðuneytið skrifa um að vörurnar ógni þjóðaröryggi Bandaríkjanna.
Trump hefur lagt verndartolla á ýmsar innfluttar vörur á grundvelli skýrslna sem hann hefur látið viðskiptaráðuneytið skrifa um að vörurnar ógni þjóðaröryggi Bandaríkjanna. Vísir/EPA

Bandarísk og kanadísk stjórnvöld hafa náð samkomulagi sem á að binda enda á innflutningstolla á kanadískt stál í Bandaríkjunum. Búist er við að Bandaríkin geri sambærilegt samkomulag við Mexíkó von bráðar. Á sama tíma ögra Trump forseti öðrum bandalagsríkjum með því að lýsa því yfir að innfluttir bílar ógni þjóðaröryggi Bandaríkjanna.

Verndartollar sem Trump-stjórnin lagði á innflutt stál og ál í fyrra hafa verið Þrándur í Götu nýs fríverslunarsamnings Norður-Ameríkuríkjanna þriggja sem á að taka við af NAFTA-samningnum. Í sameiginlegri yfirlýsingu bandaríska og kanadískra stjórnvalda í dag kom fram að 25% tollur á stál og 10% tollur á ál yrði afnuminn innan tveggja sólahringa, að sögn breska ríkisútvarpsins BBC.

Hvíta húsið jók spennu í samskiptum sínum við önnur bandalagsríki þegar ríkisstjórn Trump tilkynnti um að hann hefði lýst því yfir að innfluttir bílar og bílapartar ógnuðu þjóðaröryggi Bandaríkjanna. Það er sama réttlæting og hann notaði til þess að leggja tolla á stál og ál, jafnvel frá nánustu bandalagsríkjum Bandaríkjanna.

Trump ákvað þó að fresta því að taka ákvörðun um hvort innflutningstollar yrðu lagðir á innflutta bíla í sex mánuði. Þeim tíma ætlar hann að verja í viðræður við Evrópuríki og Japan um viðskiptasamband þeirra, að sögn Reuters-fréttastofunnar. Innflutningstollar allt að 25% á innflutta bíla hafa verið til skoðunar innan Hvíta hússins.

Engu að síður brugðust erlend ríki, bílaframleiðendur og salar ókvæða við ákvörðun Trump og kröfu um að viðskiptalönd Bandaríkjanna myndu fallast á innflutningskvóta. Cecilia Malmström, viðskiptastjóri Evrópusambandsins, hafnaði því algerlega að evrópskir bílar ógnuðu þjóðaröryggi Bandaríkjanna. Sambandið væri tilbúið að gera takmarkaðan viðskiptasamning en ekki semja um ákvarðanir sem stríddu gegn reglum Alþjóðaviðskiptastofnunarinnar.

Á meðan geisar viðskiptastríð Trump við Kína áfram. Kínverjar lögðu eigin verndartolla á bandarískar vörur á mánudag eftir að Trump lagði tolla á um 200 milljarða dollara af kínverskum vörum til viðbótar við þá tolla sem hann hefur þegar komið á.

Christine Lagarde, forstjóri Alþjóðagjaldeyrissjóðsins, varaði við því í dag að áframhaldandi viðskiptastríð gæti verið ógn við hagkerfi heimsins.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*

Mesta lækkun dagsins


Félag
Br.%
Fjöldi
Velta*
Velkomin á Vísi. Þessi vefur notar vafrakökur. Sjá nánar.