Versta byrjun Williams frá upphafi

Allir þeir sem fylgst hafa með Formúlu 1 vita hvaða lið Williams er. Liðið var stofnað árið 1977 og hefur alls unnið 9 titla bílasmiða og 7 ökumannstitla.

Keppnistímabilið hefur farið hræðilega af stað og hefur ekkert gengið upp hjá liðinu. Vandræðin byrjuðu í prófunum fyrir tímabilið er liðið mætti tveimur dögum of seint með nýja bíl sinn.

Á meðan að öll önnur lið gera bíla sýna betri milli ára hefur Williams tekist að framleiða hægari bíl ár hvert síðastliðin tvö ár. FW42 bíllinn sem liðið notar í ár er um það bil einni sekúndu á hring hægari en aðrir.

Til að rétta úr kútnum rak liðið yfirmann tæknideildarinnar, Paddy Lowe, fyrir fyrstu keppni. Nú hefur Williams ráðið Patrick Head aftur til starfa, en Patrick stofnaði liðið með Frank Williams árið 1977.

Head er þekktur fyrir mikinn aga og mun því ekki hlusta á neina vitleysu. Því er hinn 72 ára Breti sennilega fullkominn í að koma Williams aftur á beinu brautina.