Formúla 1

Uppgjör: Mercedes algjörlega óstöðvandi

Bragi Þórðarson skrifar
Bottas tryggði sér sinn annan sigur á árinu og leiðir hann nú heimsmeistaramótið.
Bottas tryggði sér sinn annan sigur á árinu og leiðir hann nú heimsmeistaramótið. Getty
Hamilton komst næstum framúr liðsfélaga sínum í fyrstu beygju. Getty

Valtteri Bottas sigraði fjórðu umferðina í Formúlu 1 um helgina sem haldin var í höfuðborg Aserbaídsjan, Bakú. Bottas byrjaði á ráspól og lét forustuna aldrei af hendi á sínum Mercedes.

Liðsfélagi Finnans, fimmfaldi heimsmeistarinn Lewis Hamilton, ræsti annar og setti gríðarlega pressu á Bottas á fyrsta hring. Bretinn komst þó ekki framúr þrátt fyrir góða tilburði og frábæra ræsingu.

Á síðustu hringjum kappakstursins var Hamilton aftur kominn mjög nálægt liðsfélaga sínum en Bottas var ískaldur og hélt forustunni. Að lokum munaði einungis einni og hálfri sekúndu á Mercedes ökuþórunum.

„Þetta var langt frá því að vera auðvelt, Hamilton setti mikla pressu á mig allan tímann,“ sagði Finninn eftir keppnina.

Bottas var í skýjunum með sigurinn sem að hann átti svo sannarlega skilið. Sérstaklega eftir óheppnina í fyrra er hann varð að láta fyrsta sætið af hendi með sprungið dekk þegar aðeins þrír hringir voru eftir.

Mercedes skrifar sig í sögubækurnar

Nú hefur Mercedes liðið náð fyrsta og öðru sæti í öllum fjórum mótunum sem búin eru í ár sem er met. Metið átti Williams liðið sem að lauk fyrstu þremur keppnum ársins 1992 í fyrsta og öðru sæti.

Sebastian Vettel á Ferrari varð aftur að sætta sig við þriðja sætið eins og í kínverska kappakstrinum fyrir tveimur vikum.

Liðsfélagi Vettel, Charles Leclerc byrjaði kappaksturinn níundi eftir að hafa klesst á vegg í tímatökum. Leclerc náði fimmta sæti í kappakstrinum á eftir Max Verstappen á Red Bull.

Úrslit helgarinnar þýða að Mercedes hefur tekið afgerandi forustu í keppni bílasmiða. Liðið hefur nú 74 stiga forskot á Ferrari.

Valtteri Bottas er aftur kominn í fyrsta sætið í keppni ökuþóra, einu stigi á undan liðsfélaga sínum. Lewis hefur verið að berjast um titilinn við Vettel síðastliðin tvö ár en nú er Þjóðverjinn orðinn 34 stigum á eftir Hamilton.

Næsta keppni fer fram á Spáni en prófanir fyrir tímabilið fóru einmitt fram á Katalóníu brautinni. Þar voru Ferrari bílarnir með nokkuð gott forskot á Mercedes og verður áhugavert að sjá hvort ítalska liðið nái loksins að kollsteypa þýska stálinu eftir tvær vikur.


Tengdar fréttir

Mercedes sigurvegari í Bakú

Finnski ökuþórinn Valtteri Bottas var fyrstur í mark í Formúla 1 kappakstrinum í Bakú í Aserbaídsjan í dag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.