Álaborg deildarmeistari í Danmörku

Álaborg er danskur deildarmeistari í handbolta eftir sigur á Kolding í lokaumferð deildarkeppninnar í dag.

Íslendingarnir í liði Álaborgar áttu frábæran leik í dag. Janus Daði Smárason var markahæstur, ásamt Sebastian Barthold, með sjö mörk og hann lagði upp tvö mörk fyrir liðsfélaga sína.

Ómar Ingi Magnússon skoraði sex mörk en átti fimm stoðsendingar í 28-25 sigrinum á Kolding.

Fyrir lokaumferðina var Álaborg með eins stigs forskot á GOG á toppi deildarinnar og þurfti því sigurinn til þess að tryggja sér deildarmeistaratitilinn.

Leikmenn GOG gerðu allt sem í þeirra valdi stóð til þess að reyna að hrifsa efsta sætið, þeir unnu Ribe-Esbjerg 32-28.

Óðinn Þór Ríkharðsson lét nokkuð lítið fyrir sér fara í liði GOG, hann skoraði aðeins eitt mark. Rúnar Kárason gerði fjögur mörk og átti fimm stoðsendingar fyrir Ribe-Esbjerg og Gunnar Steinn Jónsson skoraði fimm mörk.

Tap Ribe-Esbjerg þýðir að þeir missa af úrslitakeppninni og fara í staðinn í umspil um að halda sæti sínu í deildinni því Sönderjyske gerði jafntefli við Holstebro.

Einu stigi munaði á liðunum fyrir lokaumferðina en Sönderjyske er með betri innbyrðisstöðu og fór því upp fyrir Ribe-Esbjerg með jafnteflinu.

Arnar Birkir Hálfdánsson skoraði fimm mörk fyrir Sönderjyske en Vignir Svavarsson var ekki með Holstebro vegna meiðsla.

Ríkjandi meistarar í Skjern sendu Ringsted niður í B-deildina með 36-31 sigri.

Björgvin Páll Gústavsson varði aðeins þrjá bolta í marki Skjern en hann skoraði tvö mörk. Tandri Már Konráðsson komst ekki á blað.

Það er því ljóst að Íslendingaslagur verður í 8-liða úrslitunum á milli Álaborgar og Sönderjyske.