Umfjöllun og viðtöl: ÍBV - Fram 29-34 | Ragnheiður óstöðvandi í öðrum sigri Fram

Ingvi Þór Sæmundsson skrifar
Ragnheiður skoraði 13 mörk úr 15 skotum í Eyjum.
Ragnheiður skoraði 13 mörk úr 15 skotum í Eyjum. Vísir/Bára
Ragnheiður Júlíusdóttir skoraði 13 mörk þegar Íslandsmeistarar Fram unnu ÍBV í Eyjum, 29-34, í öðrum leik liðanna í undanúrslitum Olís-deildar kvenna í kvöld.

Fram leiðir einvígið, 2-0, og getur tryggt sér sæti í úrslitum um Íslandsmeistaratitilinn með sigri í þriðja leik liðanna á fimmtudaginn kemur.

Fram byrjaði leikinn miklu betur, skoraði fjögur fyrstu mörkin og eftir 14 mínútur var staðan 3-9, gestunum í vil. Ragnheiði Júlíusdóttur og Steinunni Björnsdóttur héldu engin bönd og Fram skoraði að vild.

Sóknarleikur ÍBV lagaðist mikið eftir því sem leið á fyrri hálfleik, ekki síst vegna framlags Gretu Kavaliuskaite sem átti góða innkomu.

Eyjakonur minnkuðu muninn tvisvar sinnum í eitt mark en gáfu hressilega eftir á lokakafla fyrri hálfleiks. Fram skoraði átta af síðustu ellefu mörkum hans og var sex mörkum yfir í hálfleik, 14-20.

ÍBV lék 5-1 vörn í seinni hálfleik og varnarleikurinn skánaði auk þess sem Andrea Gunnlaugsdóttir tók nokkur skot í markinu. 

Það dugði þó skammt, Fram var alltaf með undirtökin og áhlaup ÍBV voru máttlítil. Mestur varð munurinn átta mörk en á endanum skildu fimm mörk liðin að, 29-34.

Af hverju vann Fram?

Sóknarleikur gestanna var flugbeittur í kvöld. Fram átti auðvelt með að opna vörn ÍBV og mörkin komu á færibandi. Gestirnir skoruðu átta mörk eftir hraðaupphlaup og voru duglegir að koma Ragnheiði í góðar skotstöður sem hún nýtti frábærlega.

Annan leikinn í röð fékk ÍBV á sig meira en 30 mörk og ljóst er að vörn Eyjakvenna þarf að vera miklu betri ef þær ætla að eiga einhvern möguleika á fimmtudaginn.

Hverjar stóðu upp úr?

Ragnheiður var óstöðvandi og skoraði 13 mörk úr 15 skotum. Draumaframmistaða hjá skyttunni öflugu sem er komin með samtals 19 mörk í einvíginu gegn ÍBV.

Steinunn var frábær í fyrri hálfleik þar sem hún skoraði sex af sjö mörkum sínum. Þórey Rósa Stefánsdóttir lék mjög vel í hægra horninu og Erla Rós Sigmarsdóttir átti góðar rispur í marki Fram.

Greta var besti leikmaður ÍBV í leiknum og þá tók Ester Óskarsdóttir við sér í seinni hálfleik.

Hvað gekk illa?

Vörn ÍBV var hriplek í fyrri hálfleik og Andrea varði aðeins eitt skot. Fram hafði ekkert fyrir því að spila sig í opin færi og skotnýting liðsins í fyrri hálfleik var 80%. Þegar uppi var staðið var hún 72%.

Þrátt fyrir að sóknin hjá ÍBV hafi verið misjöfn skoraði liðið 29 mörk. Þau dugðu þó skammt því vörnin var svo ævintýralega slök.

Hvað gerist næst?

Eins og áður sagði mætast liðin í þriðja sinn í Safamýrinni á fimmtudaginn. Þar verður ÍBV að vinna, annars er liðið komið í sumarfrí.

Ragnheiður: Væri alveg til í að sleppa við að koma hingað aftur

Ragnheiður Júlíusdóttir, stórskytta Fram, skaut ÍBV í kaf í leik liðanna í Eyjum í kvöld. Hún skoraði 13 mörk úr aðeins 15 skotum og átti hvað stærstan þátt í sigri Fram.

„Ég er mjög ánægð með þennan leik. Við byrjuðum mjög vel, létum boltann ganga vel í sókninni og vörnin var mjög góð. Við vorum alltaf 5-6 mörkum á undan þeim,“ sagði Ragnheiður við Vísi eftir leikinn.

Sóknarleikur Fram gekk eins og í lygasögu í fyrri hálfleik þar sem liðið skoraði 20 mörk og var með 80% skotnýtingu.

„Það er ekki hægt að gera mikið betur en það. Að sama skapi fengum við á okkur 29 mörk í leiknum og það er kannski aðeins of mikið. En ég er mjög ánægð með leikinn,“ sagði Ragnheiður.

„Einbeitingarleysi gerði vart við sig á köflum hjá okkur. Þegar þær komu með áhlaup myndaðist stemmning í stúkunni en við ákváðum að vera yfirvegaðar og spila aðeins betur.“

Með sigri í þriðja leik liðanna á fimmtudaginn tryggir Fram sér sæti í úrslitum um Íslandsmeistaratitilinn þriðja árið í röð.

„Ég vona að það takist. Ég væri alveg til í að sleppa við að koma hingað aftur. Það væri geggjað,“ sagði Ragnheiður að endingu.

Hrafnhildur: Alltof mikið að fá á sig 20 mörk í fyrri hálfleik

„Við misstum þær of langt frá okkur strax í byrjun. Það útheimtir mikla orku að ná svona mun upp. Og þannig séð vorum við ekkert nálægt því,“ sagði Hrafnhildur Skúladóttir, þjálfari ÍBV, eftir tapið fyrir Fram í kvöld.

Varnarleikur ÍBV var slakur í leiknum, þá sérstaklega í fyrri hálfleik þar sem Fram skoraði 20 mörk.

„Það er erfitt. Við skoruðum 14 mörk en áttum samt fimm skot í markrammann. Með smá heppni hefðum við getað verið nær þeim í hálfleik. En það er alltof mikið að fá á sig 20 mörk. Vörnin var ekki nógu góð og erfitt að standa fyrir aftan hana,“ sagði Hrafnhildur.

„Við skoruðum 29 mörk sem er mikið í handbolta. En við fengum á okkur 34 mörk sem er alltof mikið.“

Eyjakonur eru komnar með bakið upp við vegginn fræga, eru 2-0 undir og tapi þær þriðja leiknum gegn Frömurum á fimmtudaginn er tímabilinu lokið hjá þeim.

„Við verðum að vinna ef við ætlum ekki í sumarfrí. Auðvitað fer maður í alla leiki til að vinna þá og við ætlum svo sannarlega að gera það á fimmtudaginn,“ sagði Hrafnhildur að lokum.

Bein lýsing

Leikirnir






    Fleiri fréttir

    Sjá meira