Davíð í Kórinn

Markvörðurinn Davíð Svansson hefur skrifað undir tveggja ára samning við HK sem leikur í Grill 66 deildinni í handbolta. Auk þess að verja mark HK mun Davíð sjá um þjálfun markvarða hjá félaginu.

Davíð, sem er fæddur árið 1985, er reynslumikill markvörður en hann hefur bæði leikið hér á landi og í Noregi. Síðast var hann í herbúðum Víkings. Hann hefur einnig leikið með Aftureldingu og Fram hér á landi.

Davíð þjálfaði einnig kvennalið Aftureldingar og var í þjálfarateymi kvennalandsliðsins.

Davíð er í námi í Noregi um þessar mundir en snýr aftur til Íslands í sumar.

HK er í 5. sæti Grill 66 deildarinnar. Elías Már Halldórsson tekur við liði HK í sumar. Frá og með næsta tímabili leikur HK heimaleiki sína í Kórnum.