Dreymir um skíðaparadís í brekkum Grundarfjarðar

Skíðamenn á Snæfellsnesi telja að í brekkunum ofan Grundarfjarðar séu náttúrulegar forsendur til að byggja upp eitt besta skíðasvæði landsins, sem bjóði upp á skíðavertíð mánuðum saman. Fjallað var um málið í fréttum Stöðvar 2. 

Þegar við vorum í Grundarfirði fyrr í mánuðinum vakti það athygli okkar að þar var talsvert meiri snjór heldur en í sveitunum í kring. Formaður Skíðadeildar Snæfellsness, Rut Rúnarsdóttir, telur skíðasvæði Grundfirðinga raunar einstakt þar sem það sé innanbæjar og mjög nálægt skólanum. 

„Krakkarnir geta bara skíðað með skólatöskurnar beint hérna eftir skóla,“ segir Rut.

Þetta er eina skíðasvæðið sem eftir er á Snæfellsnesi en núverandi toglyfta er sexhundruð metra löng. Skíðadeildin nýtur stuðnings Grundarfjarðarbæjar en einnig Stykkishólms og Snæfellsbæjar. Hér dreymir menn um að setja upp stólalyftu sem kæmi skíðamönnum upp í 500 metra hæð upp í fjallið. 

„Við viljum stækka svæðið hérna upp í Eldhamra. Við sjáum fyrir okkur að við getum verið næsta Dalvík, Siglufjörður, eitthvað svoleiðis.“ 

-Þannig að borgarbúar þurfa ekki að keyra norður í land ef þeir vilja leita sér að góðum skíðabrekkum, bara vestur á Snæfellsnesið? 

„Já, það eru ekki nema tveir tímar í að koma til okkar.“

Skíðasvæðið er búið að vera opið í fjórar vikur í vetur, sem telst víst bara nokkuð gott, í ljósi þess að ekkert skíðasvæði á landinu liggur lægra en þetta, eða niður í sextán metra hæð yfir sjávarmáli. Með því að teygja skíðalyftur lengra upp í fjall sjá Grundfirðingar fram á lengri skíðavertíð. 

„Já, þá ættum við að geta skíðað í marga mánuði. Og þar höfum við líka alveg sjúklega flott útsýni. Þannig að við stefnum að því.“ 

-Þannig að eftir kannski fá ár verða kannski þúsundir manna í brekkunum? 

„Ég geri ráð fyrir því, já.“ 

-Og skíðahótel og barir og allt? 

„Allur pakkinn,“ svarar Rut og hlær.

Einnig var fjallað um skíðasvæðið í þættinum „Um land allt“ á Stöð 2 í gærkvöldi. Þátturinn, sem er um Grundarfjörð, verður endursýndur næstkomandi sunnudag kl. 17. 

Hér má sjá frétt Stöðvar 2: