Golf

Fleetwood og McIlroy leiða en eyjaholan fór illa með Tiger

Ástrós Ýr Eggertsdóttir skrifar
Það var erfitt hjá Tiger í lok hringsins
Það var erfitt hjá Tiger í lok hringsins vísir/getty

Tommy Fleetwood og Rory McIlroy leiða Players mótið eftir tvo hringi á tólf höggum undir pari. Tiger Woods fékk fjórfaldan skolla á næst síðustu holunni.

Fleetwood var í forystu eftir fyrsta daginn ásamt Keegan Bradley. Hann náði ekki alveg jafn góðu flugi í dag og í gær, en spilaði þó á fimm höggum undir pari og hélt forystu sinni.

Bradley átti hins vegar alls ekki góðan dag í dag og féll niður í 15. sæti.

Rory McIlroy átti frábæran endasprett. Hann byrjaði hringinn á skolla en svo fóru fuglarnir að detta inn. Hann endaði hringinn svo á erni á 16. holu og fugli á þeirri 17. og jafnaði þar með Fleetwood á toppnum.

Tiger Woods var nálægt því að eiga fullkominn hring, hafði farið 16 holur án þess að fá skolla en hann missteig sig all svaðalega á 17. holu, hinni þekktu eyjaholu.

Hann fékk margfaldan skolla, holan er par 3 en hann fór holuna á sjö höggum. Hann skaut ítrekað í vatnið og komst ekki inn á flöt fyrr en í fimmta högginu sínu. Þar þurfti hann svo að tvípútta.



Tiger kláraði hringinn í dag á einu höggi undir pari eftir þennan hrikalega skolla og er í 38. sæti á þremur höggum undir pari samtals.

Sigurvegari síðasta árs Webb Simpson hefur ekki náð að vera á meðal efstu manna, hann spilaði í dag á tveimur höggum undir pari líkt og í gær og er því á fjórum höggum undir pari. Niðurskurðurinn er við tvö högg undir parið.

Jim Furyk átti besta hring dagsins í dag. Hann fór hringinn á átta höggum undir pari og skaust upp í hóp efstu manna.

Furyk fékk ekki einn skolla á hringnum, hann fékk átta fugla og því fór hann nærri helminginn af holunum á fugli. Samtals er hann á níu höggum undir pari í 3. - 6. sæti.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.