Bílar

Gerbreyttur smár Peugeot 208

Finnur Thorlacius skrifar
Nýr Peugeot 208 stendur nú á pöllunum í Genf.
Nýr Peugeot 208 stendur nú á pöllunum í Genf. Peugeot
Peugeot hefur svift hulunni af nýjum og gerbreyttum 208 bíl sínum áður en hann verður sýndur á bílasýningunni í Genf, sem opnar 7. mars.

Eins og sést á myndinni af bílnum eru miklar útlitsbreytingar á þessum netta bíl sem fellur í B-stærðarflokk bíla. Óhætt er að fullyrða að með þessari breytingu sé kominn einn mest aðlaðandi bíllinn í þessum flokki, enda hefur hann fengið ýmis útlitseinkenni frá hinum mun stærri Peugeot 508 bíl, sem er forkunnafagur. Bíllinn kemur nú á 17 tommu felgum, með LED-aðalljós og svörtu þaki.

Takkaleysi og snertiskjár

Að innan hefur Peugeot fækkað mjög tökkunum og flestu er stjórnað á snertiskjá sem reyndar er af margvíslegri stærð eftir útfærslum bílsins. Fyrir vikið virkar hann miklu framúrstefnulegri en keppinautar hans.

Þessi nýja kynslóð Peugeot 208 er 30 kílóum léttari en forverinn og með mun betra loftflæði og klýfur hann nú vindinn betur. Fyrir vikið er hann miklu hljóðlátari og stífni bílsins er líka miklu meiri og minnkar það allan titring í honum til muna.

Bíllinn verður í boði með 1,2 lítra 75, 100 eða 130 hestafla bensínvélum með forþjöppu eða 100 hestafla 1,5 lítra dísilvél, en með henni fæst bíllinn aðeins beinskiptur, en með bensínvélunum má velja milli beinskiptingar og sjálfskiptingar.






×