Arnór Þór markahæstur í öruggum sigri

Íslenski landsliðsmaðurinn Arnór Þór Gunnarsson var á sínum stað í liði Bergischer þegar liðið tók á móti Wetzlar í þýsku úrvalsdeildinni í handbolta í dag.

Bergischer var mun sterkari aðilinn og lagði grunninn að sigrinum með því að keyra yfir gestina í fyrri hálfleik. Staðan í leikhléi 16-8 fyrir Bergischer. Wetzlar náði aðeins að rétta sinn hlut í síðari hálfleik en fór að lokum svo að Bergischer vann fjögurra marka sigur, 26-22.

Arnór Þór var markahæstur í liði Bergischer með sex mörk úr átta skotum.

Á sama tíma var Bjarki Már Elísson í eldlínunni með liði Fuchse Berlin sem vann öruggan sex marka sigur á Gummersbach, 25-19. Bjarki Már með þrjú mörk úr fimm skotum.

Lærisveinar Aðalsteins Eyjólfssonar í Erlangen áttu ekki mörg svör við toppliði Flensburg en leiknum lauk með öruggum sigri Flensburg, 28-18.