Kyrrsetningu á flugvél Ernis aflétt

Isavia og Flugfélagið Ernir hafa náð samkomulagi um uppgjör vegna ógreiddra notenda- og flugleiðsögugjalda félagsins innanlands. Kyrrsetningu á flugvél Flugfélagsins Ernis hefur því verið aflétt.

Isavia og Flugfélagið Ernir fagna því að niðurstaða hafi fengist í málið og binda vonir við áframhaldandi farsælt samstarf félaganna.

Dornier-skrúfuþotan var kyrrsett snemma í janúar síðastliðnum vegna skulda en eigandi Flugfélagsins Ernis, Hörður Guðmundsson, hafði látið hafa eftir sér að skuldin vegna ógreiddra þjónustugjalda næmi 98 milljónum króna.