Funda um viðskiptastríð Kína og Bandaríkjanna

Sendinefndir Bandaríkjanna og Kína sitja nú á rökstólum í Peking með það fyrir augum að binda enda á viðskiptastríð ríkjanna tveggja. Til stendur að viðræðurnar muni standa yfir í tvo daga en þetta eru fyrstu formlegu fundahöld ríkjanna frá því að þau ákváðu að bera klæði á viðskiptavopnin í 90 daga undir lok síðasta árs.

Hvorugt ríkið hefur viljað tjá sig formlega um gang viðræðna. Talsmaður kínverska utanríkisráðuneytisins lét hins vegar hafa eftir sér að sendinefnd síns ríkis hefði trú á því að hægt verði að finna lausn í málinu, sem byggi á gagnkvæmri virðingu og jafnrétti.

Breska ríkisútvarpið hefur þó eftir hagfræðingi að ekki séu miklar vonir bundnar við það að stór tíðindi muni berast að viðræðunum loknum. Það sé einfaldlega talið að of mikið skilji ríkin að til að hægt sé að ná lendingu á aðeins tveimur dögum.

Gert er ráð fyrir að helstu þrætueplin verði hugverkaréttindi, sem Bandaríkjamenn segja að Kínverjar neiti að framfylgja, og iðnaðarmál. Ljóst er að mikið er undir, enda um að ræða tvö stærstu iðnveldi heims. Náist ekki farsæl niðurstaða gætu ríkin haldið áfram að leggja tolla á vörur hvers annars, sem þegar hefur kostað ríkin hundruð milljarða dala.