Allar skoruðu í stórsigri á Mónakó

Íslenska kvennalandsliðið í körfubolta vann sinn þriðja leik á Smáþjóðaleikunum í Svartfjallalandi í morgun þegar íslensku stelpurnar unnu 32 stiga sigur á Mónakó, 91-59.

Íslenska liðið hefur spilað mjög vel á mótinu og þetta var þriðji leikurinn sem liðið vinnur stórt.

Íslenska liðið var samt aðeins þremur stigum yfir eftir fyrsta leikhlutann, 26-23, eftir flautuþrist frá Hildi Björgu Kjartansdóttur.

Leiðir skildu aftur á móti í öðrum leikhlutanum sem íslenska liðið vann 25-5. Íslensku stelpurnar voru því 23 stigum yfir í hálfleik, 51-28, og sigurinn aldrei í hættu eftir það.

Embla Kristínardóttir var stigahæst í íslenska liðinu með 14 stig en þær Helena Sverrisdóttir og Hildur Björg Kjartansdóttir voru með 12 stig hvor.

Allir tólf leikmenn íslenska liðsins skoruðu í leiknum.

Íslenska liðið hefur unnið Möltu, Lúxemborg og Mónakó en tapaði fyrir Eurobasket liði Svartfjallalands. Lokaleikurinn er síðan á móti Kýpur á morgun.

Hér fyrir neðan má sjá myndir frá leiknum frá fésbókarsíðu Körfuknattleikssambands Íslands.

Stig Íslands í leiknum:

Embla Kristínardóttir 14

Helena Sverrisdóttir 12

Hildur Björg Kjartansdóttir 12

Hallveig Jónsdóttir 10

Bryndís Guðmundsdóttir 9

Gunnhildur Gunnarsdóttir 9

Þóra Kristín Jónsdóttir 8

Thelma Dís Ágústsdóttir 6

Sigrún Björg Ólafsdóttir 5

Berglind Gunnarsdóttir 4

Sara Rún Hinriksdóttir 1

Þóranna Kika Hodge-Carr 1