Beyoncé og Valur hafa bæði tapað í keppnishöll strákanna í München

Strákarnir okkar æfa í fyrsta sinn í München í dag í Ólympíuhöllinni þar sem að riðill íslenska liðsins verður spilaður. Þeir mæta fyrst Króatíu á morgun klukkan 17.00 að íslenskum tíma.

Ólympíuhöllin er svo sannarlega sögulegt mannvirki og er á söguslóðum en hún var byggð fyrir Ólympíuleikana í München árið 1972 eins og allur Ólympíugarðurinn sem er röð magnaðra mannvirkja.

Þar er einnig fótboltavöllurinn sem byggður var fyrir sömu leika en Vestur-Þýskaland fagnaði heimsmeistaratitlinum á þeim velli eftir sigur gegn Hollandi árið 1974. Í seinni tíð muna kannski flestir eftir honum sem heimavelli Bayern München áður en liðið flutti á Allianz Arena.

Endurkoma handboltans

Handbolti kom aftur inn á Ólympíuleikana í München árið 1972 en þar var íslenska liðið á meðal þátttökuþjóða. Okkar menn unnu Túnis og gerðu jafntefli við Tékkóslóvakíu en töpuðu fyrir Austur-Þýskalandi og sátu eftir í B-riðli. Frábært lið Júgóslavíu stóð uppi sem Ólympíumeistari.

Á sömu Ólympíuleikum gerðist sá voðaverknaður að átta Palestínumenn réðust inn í Ólympíuþorpið, myrtu tvo Ísraelsmenn og héldu níu öðrum í gíslingu. Gíslarnir og hryðjuverkamennirnir létust svo allir eftir umsátrið en eftir 34 klukkustunda pásu á leikunum lét Alþjóðaólympíunefndin leikana halda áfram.

Í sundhöllinni í Ólympíugarðinum árið 1972 fór Bandaríkjamaður að nafni Mark Spitz á kostum en hann vann til sjö gullverðlauna og setti sjö heimsmet. Það met stóð til ársins 2008 þegar Michael nokkur Phelps vann átta gull í Peking.

Háskólarokkið sigraði

Fleiri íslenskir handboltamenn hafa svo spriklað á fjölum Ólympíuhallarinnar en Mulningsvél Vals tapaði úrslitaleiknum í Evrópukeppni Meistarahafa fyrir Grosswallstadt, 21-12, árið 1980.

Þetta er enn í dag eitt merkasta handboltaafrek íslensks félagsliðs en Valsmenn komust í úrslitaleikinn með því að leggja stórlið Atlético Madrid á útivallamörkum í undanúrslitum. Þýska liðið reyndist aðeins of stór biti í úrslitaleiknum.

Ólympíuhöllin í München hefur hýst marga stórviðburði eins og EM í körfubolta 1993, úrslitahelgi Meistaradeildarinnar í körfubolta 1999 og ekki má gleyma að nefna MTV tónlistarverðlaununum árið 2007 þar sem voru heldur betur senur.

Í baráttunni um besta lagið var búist við harði samkeppni þeirra Beyoncé og Shakiru með lagið Beautiful Liar gegn Rihönnu sem gaf út einn sinn frægasta smell um regnhlífarnar sama ár. Amy Winehouse heitin var einnig tilnefnd sem og Nelly Furtado en háskólarokkpían Avril Lavigne stóð uppi sem sigurvegari með lagið Girlfriend.