Viggó meðal markahæstu manna

Tíu íslensk mörk litu dagsins ljós í fimm marka sigri Westwien á Ferlach í austurrísku úrvalsdeildinni í kvöld.

Viggó Kristjánsson var næst markahæstur í liði Westwien með fimm mörk. Guðmundur Hólmar Helgason gerði þrjú og Ólafur Bjarki Ragnarsson tvö í 31-26 sigri Westwien.

Lærisveinar Hannesar Jóns Jónssonar náðu yfirhöndinni snemma leiks og gáfu hana aldrei eftir. Staðan 16-9 í hálfleik og lauk svo með fimm marka sigri.

Ísak Rafnsson skoraði tvö marka Tirol í sex marka sigri liðsins á Leoben 35-29.

Heimamenn í Tirol leiddu 17-14 í hálfleik eftir að hafa verið yfir allan leikinn.

Westwien er í fimmta sæti deildarinnar með 16 stig, tveimur stigum meira en Tirol í sjötta sætinu.