Lampard vill Terry en launakröfurnar of háar

Frank Lampard, stjóri Derby County, væri til í að fá samningslausan John Terry til félagsins en segir hann of dýran fyrir félagið og að liðið þurfi að eyða peningunum á annan hátt.

„John er frábær leikmaður og frábær persóna. Hann væri frábær fyrir öll félög,” sagði Frampard sem var afar ósáttur við dómarana í síðasta leik liðsins gegn Rotherham.

Hann var sendur upp í stúku og er á leiðinni í leikbann en hann hefur samþykkt leikbann enska knattspyrnusambandsins án mótmæla.

„Ég myndi vilja fá John Terry. Allan daginn, alla daga en ég held að við getum ekki borgað honum þau laun sem hann vill. Það er mjög einfalt.”

„John verður frábær í því sem hann tekur sér fyrir hendur. Þegar þú ert goðsögn í leiknum þarftu að sinna leiknum, sinna fjölmiðlaskyldu og það getur hann. Hann mun gera það vel.”